Shillong, Nailar 31 : Haba kyntait ia ki khubor ban don ka jingkyntiap seng jong kiba bun ki MLA sha ka BJP, u President ka UDP Bah Metbah Lyngdoh ha ka sngi Nyngkong ula ong ba baroh ki 12 ngut ki MLA ki dang iatylli mlon ha Jylla.
“Kam don satia kano kano ka kynrum kynram ha ka UDP kat haduh mynta. Nga la iakren bad hi ia baroh ki MLA, ym lyngba kiwei pat, bad ym don uwei ruh na ki ba ong ba kin leit iasoh BJP. Nga ioh sngew ia kane tang ha ki lad pathai khubor” ong u Bah Metbah.
U ong ba ki jingiakren ba khyndait ngut ki MLA kin leit iasoh sha ka BJP ka dei tang ka jingmutdur hi.
“Ki jingmutdur kan iai neh ka jingmutdur. Ngan iathuh haphi tang ia kaei kaba jia” ula ong.
Halor ka khubor ba ki MLA ka UDP kila hiar kyrkieh sha Delhi ha kine ki arsngi bala leit, u Bah Metbah ula ong “Kane ka long kaba sngewsih bad ka bym dei satia. Nga don ha Shillong baroh shi taiew. Nga leit sha Delhi tang ha ka sngi Nyngkong jong ka taiew bala lah na ka bynta ki prokram Sorkar. Ki khubor ki ong ba Nga la donlang ha Delhi bad ki MLA ha kine ki arsngi, ka dei kaba bakla”.
U iathuh ba ka jingleit Delhi dang shen ka dei namar ka FCRA.
“Khyndai ngut ki MLA kila iakynduh ia u Myntri kam Pohiing halor ka FCRA Amendment ha Parliament” ula ong.
Halor ka khubor ba ki MLA ki sah ha Guwahati bad Kolkata, ula pynshai, “Saw ngut ki MLA- Bah Renikton, Pius Marwein, Balajied Synrem, Kyrmen Shylla bad Synshar Lyngdoh- kila leit sha Kolkata ha ka janmiet sngi Thohdieg namar ki kam shimet ym ka kam sain pyrthei”.
“Kiwei pat ki MLA ki don lut ha Shillong. U MLA ka Mawphlang Bah B Kurbah u don ha Shillong, u MLA ka Mawsynram Olan Sing Suin u don ha Ophis ha Shillong, u Bah Lahkmen Rymbui u don ha Shillong. Kumta, ka khubor ba ki iahiar sha Guwhaati ban iakynduh ia ki nongialam ka BJP ban iapyn beit khatduh ia ka jingiasoh ka dei kaba bakla bad ka bym donkam”ula bynrap.
U Bah Metbah ula ong ba kam shym la don satia kano kano ka jingbym sngewtynnad halor ka jinglong nongialam jong u. “Nga la iakynduh ia baroh ki MLA bad kylli ia ki. Ym don mano mano ba pynpaw ia ka jingbym sngewhun ia ka jinglong nongialam jong nga. Ki iakmen lut baroh haduh mynta” ula ong.
Ula kyntu ia ki lad pathai khubor ban da pynshisha. “Sngewbha pynshisha hashuwa ban shna ia kano kano ka khubor, lem kymta kan phah ia ka khubor kaba bakla sha ki paidbah” ula ong.
