Yn pynshong shit u Khalid, Swae Lee, Boys Like Girls
Shillong, Nailar 31 : Ka Shillong Cherry Blossom Festival-2026 kan long ha ka 20-21 tarik Naiwieng ha ka jaka thymmai ka ban pynlong noh shirta-ka New Shillong Highland Ground- ha kaba ki kynhun tem bapher bapher kin pynshongshit ia ka tamasa kynthup ia ki khlur rwai ka ri America Khalid, Swae Lee bad Boys Like Girls kum ki kynhun bar ri bala pynbna nyngkong.
Ki nongpyniaid ki pyntip ba kan sa pynbna biang shen sa ia arngut/artylli ki kynhun nabar ri ki ban wan tem ha kane ka tamasa.
Kane ka tamasa kala leit sha New Shillong hadien ka jingjop ka tamasa 2025 kaba wan pynshongshit u Jasan Derulo, The Script, Tyga, Diplo, Nora Fatehi bad Aqua.
Ka Sorkar Jylla kala ai ia ka New Shillong Highland Ground kum ka jaka ba shirta ban pynlong ia ki tamasa kiba heh bad ki concert.
Ki nongpyniaid ki ong ba kane ka jaka, kaba jngai 30 minit na sor Shillong, kan pynsuk bha ia ka leit ka wan jong ki nongwan tamasa na Jowai, Assam bad ki Jylla ba marjan.
Ka jingpynkynriah sha kane ka jaka thymmai kala pynslem ia ka jingpynbna ia ka thup ki nongtem bad nongrwai jong une u snem namar ka jingdonkam ban pynbit pynbiang ia ki jingdonkam baroh na ka bynta kine ki nongrwai nabar ri. Da ka jingpynthikna mynta ia ka jaka, ka jingialap kan iaid shaid shaid noh shakhmat, ong ki nongpyniaid.
Ia ki ticket yn die live ha ka 4 tarik Nailur ha ka por 6 baje janmiet tang na ka RockskiTickets.com, bad ka pass ba treikam shisngi ka shongdor T.2500 kynthup ki khajna.
