Shillong, Nailur 28 : U Nongialam ka UDP bad Myntri barim ka Sorkar Bah Paul Lyngdoh hynne ka sngi Balang ula ong ba ym don mano mano ruh la phi heh phi khraw katno katno ruh, ban lah pynkylla ia ka jingiaid ka histori lyngba ki katto katne ki kyntien na ki jingkren.
Une u Nongialam ka UDP ula kren ia kane haba kynthoh ia ka jingkren u Hehduh ka Rashtriya Swayamsevak Sangh (RSS) Dr Mohan Madhukarrao Bhagwat ba ong ba baroh ki briew ba sah ha India ki dei ki Hindu.
“..Ngi ju khot beit ialade kum ki Khasi, U Khun Hynniewtrep Hynniewskum- kane ka dei ka tynrai jong ngi bad ym don mano mano la phi heh phi khraw katno katno ruh ba lah ban pynkylla ia ka jingiaid ka histori lyngba ki katto katne ki kyntien ha ka jingkren” ong u Bah Paul uba dei ruh u MDC na Jaiaw, haba iakren bad ki nongthoh khubor.
Haba kren halor ka histori, une u Nongialam ka UDP ula ong “Ngi la kylla long colony namar ka sorkar Bilat ka la lah jop thma ia ka India haduh ha Myanmar, kaba pynlong ia ki nong Burma ban soi ia ka Treaty of Yandaboo ha u snem 1826.. Mynta kawei pat ka long ba naduh mynno ngi la kylla Khristan”.
“Kiba bun na ngi, ngi la kylla Khristan ha u snem 1841-42. Ha ka 2 tarik Jylliew, 1841, u reverend Thomas Jones ula wan poi ha Sohra. Ka la shim katto katne por ia u ban sngewthuh ia ka ktien Khasi hashuwa ban ialap bad ngi tharai baka jingpynkylla Khristan ba nyngkong eh ka long ha u snem 1841-42” ula bynrap.
U Bah Paul ula ong baka Presidential Order jong ka Schedule Tribe kala wan bad ia ki Khasi la pynhap kum kawei na ki ST kaba mut ha u snem 1950. “Ngi la kylla colony ha u snem 1826, ngi la kylla nong India ha u snem 1947-48, shuwa ia kane ngi la kylla Khristan ha u snem 1841-42, bud sa ka ST ha u snem 1950 bad nong Meghalaya ha u snem 1970-72, kumno ngin dei ki Hindu”.
Haba kylli la kane ka jingkren u Khiehduh ka RSS kan ktah jur ia ka BJP ha ka elekshon MLA- 2023, u Bah Paul ula ong “Kane ka dei ka jingkylli kaba eh bha ia nga ban jubab namar ngam sngewthuh ia kaei ka jingmut jingpyrkhat jong ki. Nga tip tang kane ba ula kren ia kine ki kyntien tang saw bnai shuwa ka elekshon ha Meghalaya. Kaei ka jingthmu, kaei kaba don ha lyndet, u tip kham bha”.
