New Delhi, Nailur 20: Ha ka sngi baar jong ka Dorbar Kypang haka ïingdorbar Parliament kala wanrah iaka Women’s Reservation Bill ia kaba la ai kyrteng da ka ‘Nari Shakti Vandan Bill’.
Ha ka sngi Hatmajai, ia katei ka Bill la wanrah tang hadien ba la sdang iaka dorbar hapoh ka Parliament kaba thymmai, ha kaba u Myntri ka Sorkar Pdeng uba khmih iaka tnad Aiñ u Arjun Ram Meghwal ula wanrah ia kane ka Bill bad mynta ka jingiatai ka dang iaid shakhmat hapoh ka Lok Sabha.
Kaei ka Women’s Reservation Bill?
Hapoh jong ka Women’s Reservation Bill, la bhah kyrpang 33 percent ia ki Seat na ka bynta ki kynthei ha ka Lok Sabha bad ki State Assembly. Ki kynthei kin ioh ia ka jingmyntoi na ka jingbhah kaba 33 percent ia ki Seats na ka bynta ki SC-ST.
Ha kane ka Bill, la don ruh ka jingtyrwa ba ha ki Seat kiba la bhah na ka bynta ki kynthei kan don ka jingpynkylla man ba don ka Delimitation ne ka jingphiah ia ki Constituency.
Kaba mut ba ki seat kiba la bhah ia ki kynthei yn sa pynkylla lyngba ka jingphiah thymmai ia ki Constituency ha ka Lok Sabha bad ha ki Assembly.
Haba iakren bad ka por jong ka Women’s Reservation Act, kan long na ka bynta 15 snem, nuksa kane ka jingbhah kyrpang kan kut hadien 15 snem bad hadein ba la kut kane ka por, ia kane ka jingbhah lah ban pynkiew lyngba ka jingwanrah ia ka jingpynkylla hapoh jong ka Parliament.
Kane ka mut ba lada kane ka Bill ka ioh ia ka jingmynjur bad ka kylla aiñ, hynrei h kane kan ym pat treikam ha ka elekshon Lok Sabha 2024.
Balei kane ka Bill kan ym treikam ha ka Elekshon Lok Sabha 2024?
Ban sngewthuh kham bha balei kane kan ym pat treikam ha ka elekshon Lok Sabha 2024, donkam ban tip ba ka Women’s Reservation kan treikam tang ynda la dep ban phiah ia ki Constituency. Ka jingphiah thymmai kan jia tang hadien ba la pyndep iaka jingleh ia ka khanasamri ne Census.
Ban sngewthuh shai kdar ba lada iaka Women’s Reservation Bill la mynjur bad kala kylla long kum ka aiñ, yn ym pat pyntreikam ia ka haka elekshon Lok Sabha 2024.
Kawei na ki kyndon jong kane ka Bill bathymmai ka ong: “Ki kyndon jong ka riti synshar ha kaba iadei bad ka jingbhah ia ki seatna ka bynta ki kynthei ha ki iingdorbar thawaiñ, ki iing dorbar thawain jong ki jylla bad ka iingdorbar thawain jong ka Delhi kan treikam hadien ba la pyndep ia ka jingphiah ia ki Constituency na ka bynta katei ka kam hadien ba la ioh ia ki jingtip bad ki jingkheiñ naka khanasamari kaba nyngkong, hadien ba la pyntreikam bad pynmih iaka Constitution (128th Amendment) Act 2023.
Lada phi pule ia kane ka jingthoh, kumta phi donkam ban tip ba kane ka bill kaba ai 33 Percent ka jingbhah kyrpang ia ki kynthei kam dei kaba thymmai. Ia ka women’s reservation bill la wanrah nyngkong eh ha u snem 1999.
Kane ka Bill kala iohi ia ki 8 tylli ki sorkar kiba la pyrshang ban pyniaid shakhmat ia ka jingbhah 33 percent na ka bynta ki kyrtong kynthei ha ka Lok Sabha bad ha ki State Assembly.
Ka jingdon jong ki MP Kynthei ha Lok Sabha
Kumba long mynta ki don kumba 78 (14.39 per cent) ki kynthei kum ki dkhot ha ka Lok Sabha na ka 542 ngut ki dkhot. Ha u snem uba la leit, ka sorkar kala pyntip ba ka jingdon ki kynthei ha ki State Assembly ha kylleng jong kane ka ri ka long tang 8 percent.
Da ka jingwanrah iaka Women’s Reservation Bill, hapoh Lok Sabha bad States/Union Territory Assemblyn yn sa sakhi iaka jingbun ki kynthei kum ki dkhot haka iingdorbar thawaiñ.
Ka Histori jong ka Women’s Reservation Bill
27 snem mynshwa, iaka Bill la wanrah da ka sorkar hapoh ka jingialam u HD Deve Gowda kala wanrah ia kane ka Bill hapoh Parliament ha ka sien kaba san.
Dei ha ka 12 tarik u Nailur 1996, ia kane ka bill la shim nyngkong eh da ka Parliament ban iatai lyngba ka jingwanrah iaka Constitution (81st Amendment) Bill, 1996, ha ka Lok Sabha kaba 11. Hadien kane, la phah ia katei sha ka Joint Committee jong ka iingdorbar Lok Sabha bad Rajya Sabha.
Ia ka kaiphod kaba la wanrah da ka Committee jongka Lok Sabha ha ka 9 tarik u Nohprah 1996, hynrei kane ka bill kala iap noh namar bala pynkut noh iaka iingdorbar kaba 11 jongka Lok Sabha.
Kumjuh ha u snem 1998, ia ka Constitution (84th Amendment) Bill, la wanrah ha kaba samoi ba wan jongka Lok Sabha bad kane ruh kala iap noh namar ba la pynkut noh ia ka samoi treikam jong ka iingdorbar.
Ha ka 23 tarik u Nohprah, ia ka Constitution (85th Amendment) Bill la wanrah ha ka iingdorbar kaba 13 jongka Lok Sabha hynrei ym shim la pdiang namar bay m shim la ioh iaka jingmynjur na baroh. Kane ka Bill kala iap noh ha u snem 1999, da ka jingpynwai noh iaka iingdorbar.
Ha ka 9 tarik u Lber 2010, ia ka Constitution (108th Amendment) Bill, 2008, la mynjur da ka Rajya Sabha bad la bat sah ia kane bad ym shim la wanrah satia hapoh jong ka Lok Sabha.
Lah ban kdew ba ka Bill kaba la wanrah ne mynjur ha Rajya Sabha kam ju iap, kaba mut ba ka Women’s Reservation Bill ka dang im haduh mynta.
Hynrei katei ka Bill ba kan kylla long aiñ ka donkam ban ioh ia ka jingmynjur na baroh ar tylli ki iing dorbar thawain jong ka ri.
