Nongpoh, Nailur 22: Ka kynhun ialehkai football jong ki kynthei ba la tip kum ka Synroplang Fc hynne ka sngi Thohdieng, ka la khur ia ka namjop ba nyngkong da kaba pynliem ia ka kynhun jong ka Smit Fc da 3-0 ha ka sngi sdang jong ka lympung ialehkai kaba la tip kum ka 2nd Women’s Knock Out Football Tournament ba la pyniaid da ka Oste Phi Oiñ ha madan ialehkai jong ka Umroi.
Ia kane ka lympung ialehkai football la wan ban plie pyrda da u Bah Bipul Thangkhiew, President ka RBYF Sengkmie, ha ka jingiadonlang ruh ka Kong V Lyngdoh, Branch Manager ka State Bank of India Umroi, ki nongkitkam ka Oste Phi Oiñ u Bah Shallan Sylliang bad u Bah PB Sylliang.
Haba phai sha ka jingiakhun ha kane ka sngi, la sakhi ia ka jingiakhun kaba iakhaid bormet bha hapdeng ki thei ialehkai jong baroh ar tylli ki kynhun ban khur ia ki namjop hynrei katba ka por ka dang iaid ka kynhun jong ka Synroplang Fc ka la nion naphang ia ka Smit Fc bad tad haduh ban da kut noh baroh ar ki kylla ka Synroplang ka la ioh ban khyrwit haduh 3-0 ban jam shaphrang jong kane ka lympung ialehkai football ka Oste Phi Oiñ.
Haba kren kum u kongsan u Bah Bipul Thangkhiew, u la ai ka jingiaroh ia ka kynhun jong ka Oste Phi Oiñ, ki la shimkhia ban pynlong ia ka lympung ialehkai football na ka bynta ki kynthei kum ka jingplielad lem na ka bynta ki samla kynthei ruh kiba don ia ka sap ialehkai football ba kin ioh ia kata ka rynsan kaba biang ban kiew ha ka jingim ialehkai football ka jong ki.
U la ong ruh, ba ka kam football mynta ka la dei kaba paw ha ka pyrthei bad kum kane ka lympung ialehkai kan iarap ia ki samla ban nang pyntbit ialade ban kyntiew ia ka sap ialehkai kaba ki don bad ruh ban paw sha ka pyrthei, da kaba bynrap ruh, ba ki kynthei kim dei ban shu sahkut tang hapoh ka iingshetja hynrei haba ki don ia kano kano ka sap ha ka kam ialehkai sport ki dei ban mih shakhmat ban pynphyrnai ia la ka jingim.
