Guwahati, Iaiong 30: Ha kawei ka jingjia ba sngewsih, kumba 14 ngut ki briew, ki la duh noh ia la ka jong ka jingim namar ka jingpluh ding ha kawei ka hotel hapoh Kolkata haka miet 29 tarik Iaiong.
Kane ka jingpluh ding ka la jia ha ka por kumba 8:15 baje mynmiet ha Rituraj Hotel kaba don ha ka thain Burra Bazar.
Haduh mynta la lap ia 14 tylli ki met iap, bad la lah pyllait im ia katto katne ngut ki briew.
“La thaw ia ka kynhun tohkit ba kyrpang ban tohkit ia katei ka jingjia,” la ong u heh ophisar.
Watla iaka ding la lah ban tem hynrei iaka daw jong ka jingpluh ym pat lah ban tip.
Ka Myntri Rangbah ka West Bengal, ka Mamata Banerjee, ka la pynpaw ia ka jingsngewkhia halor ka jingduh ei ki mynsiem briew.
Haka X (Twitter) ka Mamata Banerjee ka la ong, “Ka jingsngewlem jong nga ka leit sha ki ba shah ktah ha ka jingjia pluh ding kaba la jia ha kawei ka hotel shimet (Rituraj) ha Burra Bazar. Nga la lum jingtip ïa ki kam pynlait im bad pynlip ding baroh shi miet bad nga la pynlong ïa ka jingtohkit kaba heh tam jong ki pulit pynlip ding ha katei ka thaiñ”.
Ka la bynrap shuh shuh, “Ka jingsngewlem jong nga sha ki longïing kiba la duh noh bad ka jingïatylli sha baroh kiba shah ktah. Ka Sorkar kan ai jingïarap daka song pisa l kaba T.2 lak sha kiba haïing hasem jong kiba la khlad bad T.50,000 sha uwei pa uwei uba mynsaw.”
Ka Myntri Rangbah ka la ai khublei ruh ïa ka jingpyrshang jong ki bor pynlip ding, ki pulit, bad ki nongshong shnong jong ka thaiñ. “Ka kaiphod ka pyntip ba kitei ki briew ki la iap namar ka jingbym lah ban ring mynsiem ne na ka jingmynsaw haba ki pyrshang ban phet krad. Ka jingtohkit kaba kham bniah ka dang iaid shakhmat.
Naka liang u Myntri Sorkar Pdeng bad u President ka BJP jong ka West Bengal, u Sukanta Majumdar, u la kyntu ia ka Sorkar Jylla, ba kan shim khia mardor ban pyllait im ia kiba la shah ktah bad u la ban jur ia ka jingdonkam ban buddien bad kham pyrkhing ia ka jingbud ryntih ia ki kyndon iada na ka ding, ha ki por ban wan ban iada na kum kine ki jingjia ba sngewsih.
