Shillong, Rymphang 01: Ki dkhot ka Lum Sohpetbneng Committee ka Seng Khasi Kmie Mawkhar Shillong hynne ka sngi Balang, kila ia wer ia ki parakur parakha najan bad na jngai ka bri u Hynniewtrep Hynniaw Wasa ba kin ia khreh ban ia leit ia shim bynta sha ka Kiew Pyneh Rngiew kaba shi sien shi snem, kaban long haka 5 tarik u Rymphhang ha u lum kyntang u Sohpetbneng.
Haba iakren bad ki lad pathai khubor u nongai ktien ka komiti ba dei artad u Vice President ka Lum Sohpetbneng Committee u Rgh Paia. B. Synrem ula kyntu bad wer ia ki parakur parakha ba kin ia wan sha kane ka kiew pyneh rngiew kaba ar snem hadien ym shym la lah ban pynlong ia ka kumba ka juh dei ban long hadien bala wan ban lynshop ka pang iabit Covid 19.
U Rgh Paia. B. Synrem ula pynpaw ba ha kane ka kynti kaba mynta ynda haba ka pyrthei ka mariang ka la sdang ba kan lait na kane ka pang ka shitom ne ka khlam ka ngoh bad ka jingioh jingbit na ki bor synshar ka long kaba laitluid, ka komiti ka wer ia ki paidbah ban ia wan sha kane ka kiew pyneh rngiew.
“Ka komiti ka la pynbna artad ia ki kyndon ba kan pyntreikam ha kane ka sngi, ha kaba yn nym shah palat ia ki kali ba kin kiew shaduh jan kliar jong u Lum Sohpetbneng, la kyntu bad maham ruh ia ki nongwan ba kin kiar ha kaban pynjaboh ia ki sawdong ki sawkun bad ia ki bynta ba marjan jong une u lum kyntang bad ki jaka ba marjan, la mana bym dei ban sliew ne thang ding ha ki jaka long khlaw, bad ia ki song jingbam ym dei ban bret pathar ia ki” la ong u Rgh Paia. B. Synrem.
U Rgh Paia. B. Synrem ula kyntu ia ki nongwan kiew pyneh rngiew ba haba ki wan, kin wan da ka skor ka burom, ka tipbriew tip blei bad burom bad kohnguh ia kaei kaba la pyniaid da ki nongkitkam jong ka Komiti bad jong ka seng hi baroh kawei.
