Nongpoh, Naitung 26: Ka Nongpoh Town Committee (NTC) ka la khot la wer ia ki nongshong shnong kiba hap hapoh ka jingpeit jingkhmih jong ka Town Committee ba kin shim ia ka lad ban applai ia ka skhim iarap shna iing kaba la tip kum ka Pradhan Mantri Awas Yojana – Urban (PMAY-Urban) bala pyntrei da ka tnad Meghalaya Urban Development Authority (MUDA).
U Bah Rayonald Kharkani, Secretary ka NTC, u la pyntip, ba lyngba kane ka skhim iarap shna iing, yn ai jingiarap ia kito ki longiing kiba ioh tulop ne kamai ha iing ka ba long haduh 3 lakh tyngka shi snem, ba kin ioh jingïarap lyngba ka skim Housing For All (PMAY-Urban).
U la iathuh ruh, ba lyngba kane ka skhim, ki nongioh jingiarap ban shna iing lade, kan ai ia ka jingkyrshan haduh 1.5 % ka installment na bynta kito kiba kwah ban shna iing thymmai ne pynkhaiing. Ka jingiarap ka long da ka subsidy.
U la pyntip ruh, ba ka Nongpoh Town Committee dang shen ka la ioh ruh ia ka khusnam kum ka “Best Performance Nagar Panchayat” naka Ministry of Housing and Urban Affairs halor ka jinglah ban pyntreikam bha ia ka PMAY-Urban Scheme.
Ula pyntip ba kawei ka longing na Nongpoh ka la ioh ia ka khusnam “Best House Construction “ halor ka jinglah ban shna itynnad ia ka iing lyngba kane hi ka skhim bad haduh mynta kumba 600 tylli ki iing la dep ban tei bad don kiba dang pyntrei ruh.
Namar kata, ka NTC ka la khot ia ki paidbah ban leit applai ia kane ka skhim iarap shna iing lyngba ka office jong ka District Urban Affairs, Nongpoh hapoh ka 4 tarik Nailar 2023 da kaba rah ruh ia ki kot ki sla kum ka Voter’s ID card, Aadhar Card jong ki ba apply bad ki Khun Ki Kti, Ka kot Jingkamai jingioh, Patta, bank pass- book bad 2 tylli ki dur passport.
U Myntri Rangbah ka Jylla ang shen ula ai ka jingiaroh ia ka Ri-Bhoi District kaba la ioh pdiang ia ka khusnam na ka Sorkar Pdeng halor ka jinglah ban pyntreikam bha ia ka PMAY-Urban Scheme.
Haba iaroh hapoh ka Twitter, u Myntri Rangbah ula ong “ “Aspiration District, ka Ri-Bhoi kala jop biang sa shisien”.
Kat kum ka jingong jong u, Kawei ka Nongiohskhim na Nongpoh kala ioh ia ka khusnam “Best House Construction” jong ka skhim PMAY-Urban Scheme.
Ula pyntip ruh ba ka Nongpoh Town Committee (NTC) kala ioh ia ka khusnam “ Best Performing Nagar Panchayat” halor ka jinglah ban pyntreikam bha ia ka skhim ha Nongpoh kaba la ai da ka Ministry of Housing and Urban Affairs.
