Tura, Naitung 26 : Ki Pulit ka West Garo Hills kila iohkem haduh 35 ngut ki briew kiba kynshoit ban lun maw ia ka Chief Minister Office, Tura nalor uwei u briew uba la wer ia ki paidbah ban ieng iakhun pyrshah ia ki bor Sorkar bad ban hiar thma ia ka Iingsah u Myntri Rangbah kaba don ha Tura.
Une u briew ba wer ia ki paidbah lyngba ki jingthoh ha ki social media, u kyrteng u Sengbath D Sangma.
Kat kum ka khubor Pulit, une u briew ula pynsaphriang ia ka jingthoh ha ki rynsan social media ba wer ia ki paidbad ba kin iakhih paidbah noh nalor ban hiar thma ia ka Iingsah u Myntri Rangbah kaba don ha Tura.
Ula kyntu ruh ia ki paidbah ba kin pha iala ka jingim kumba jia ha ka 30 tarik Nailur 2005.
Haduh khyndai ngut ki briew kila iap ha ka jingther kuli ki Pulit ha u snem 2005 katba ki paidbah ki dang iakhih ban pyrshah ia ka jingphiah noh ia ka Meghalaya Board of School Education (MBoSE). Saw ngut ki briew kila kyllon iap ha madan Chandmary, Tura katba 5 ngut kila iap ha madan Rongrenggre, Williamnagar.
Nalor kane, la pyntip ba ki Pulit kila kem ruh ia kawei ka Nongialam Sengbhalang ba paw ka thain kaba la tip kyrteng kum ka Jaynie Sangma.
