Shillong, Nailar 29 : U Lamphang ka Iingdorbar Thaw Ain Thomas A Sangma ha ka sngi Palei, ula pyndam/weng noh ia ki katto katne ki jingkren jong u President ka Voice of the People Party (VPP) Bah Ardent M Basaiawmoit haba wanrah ia ka mat iatai kaba lyngkot ha Iingdorbar Thaw Ain.
U Thomas ula ong ba une u nongwanrah ia ka mat, ula pyndonkam ia ki katto katne ki kyntien ki bym iahap bad kila long pyrshah ia ka rules bad kumta, ia kine ki kyntien ym dei ban ailad ba kin long shi bynta jong ka jingiakren hapoh ka Iingdorbar.
“Kumta, ia kine ki kyntiew ba long pyrshah ia ki rules bala pyndonkama da une u droks, yn weng noh na ka jingbuh jingthoh jong ka Iingdorbar. Kane ka dei ka hukum jong nga” pynbna u Lamphang.
U Bah Ardent haba wanrah ia ka mat iatai ba lyngkot ba iadei bad ka jingthungkam ia ki nonghikai, ula kynnoh ia u Myntri ka Tnad Pule Puthi ba u don bynta ha ka jingkren shun ia ka party.
Haba dawa ban leh eiei, u Bah Ardent ula kyntu ia u Myntri Rangbah ka Jylla lane Symbud Myntri Rangbah ba kin ai jubab halor kane ka kam.
U Symbud Myntri Rangbah ba khmih ia ka Parliamentary Affairs Bah Prestone Tynsong, ula niew ia kane ka jingkynthoh jong u Bah Ardent kum ka jingkynnoh ba shimet pyrshah ia u Myntri.
