Shillong, Nailar 29 : U Myntri Rangbah ka Jylla Conrad K Sangma ha ka sngi Palei, ula pyntip ba ka Sorkar Jylla kala pynlut palat T. 100 klur ban thung ia ki tynrai dieng ha kine ki san snem bala leit noh.
Haba jubab ha Iingdorbar Thaw Ain, u Conrad ula ong ba ia kine ki tynrai dieng la thung ha ka jaka kaba heh kumba 1.19 lak hectare.
Ula pyntip ruh ba ki don haduh 99,78,352 tylli ki tynrai dieng bala thung hapoh ka Jylla naduh u snem 2020 tad haduh u bnai Jylliew 2024. Ki symbai dieng kiba im kila kot ia palat 73,76,735 tynrai.
Halor ka jingkylli bynrai da u MLA ka VPP na Mawryngkneng Bah Heavingstone Kharpran, u Myntri Rangbah ula ong ba 75% kam dei kaba sniew ha ka jingim jong ki tynrai dieng hynrei khem pep ka Sorkar ka kwah ban pynthikna ba ki tynrai bala thung kin im beit 100 na ka 100.
“Ngi la pyrshang katba lah haba ngi thung ia kine ki dieng. Ngi la wanrah lang ia ki Shnong bad da ka jingiashimbynta lang jong ki, ka jingim ki tynrai dieng ka kham bun” ula ong haba bynrap ba ka Sorkar ka dang pynkhreh ruh ia ki lad ai jingmyntoi sha ki Shnong ki thaw ban nang pynbun ia ka jingim jong ki tynrai dieng ka ban kot 100 na ka 100.
Kat kum ka jingong jong u, kala don ka jingleit jngoh ia ki tynrai dieng manla ka por.
