Nongstoiñ, Nailar 18: Ka District Congress Committee ha ka sngi saitjaiñ, ka la weng syndon ia u MLA ka Nongstoin Bah Gabriel Wahlang na ka kam President ka Nongstoin Block Congress Committee (NBCC) hadien ka jingshah sospon ha ka Party namar ki kam ba ula leh pyrshah ia ka party.
Kane ka rai kala mih na ka jingialang jong ka Executive Committee ka District Congress Committee ka West Khasi Hills, kaba la iakren sani halor ka jingshah sospon haduh 6 snem une u MLA.
Ka DCC kala thung mynta iau Bah Eirc Kharsyntiew kum u President ba shipor jong ka NBCC ha ka jaka jong u Bah Gabriel.
Ha kane ka jingialang,ka DCC kala iaphylliew jingmut ruh kumno ban pynkhlain ia ka party ha baroh lai tylli ki Block jong ka West Khasi Hills ba kynthup ia ka Nongstoin, Mawshynrut bad ka Rambrai-Jyrngam.
Haba kren sha ki lad pathai khubor, u President ka DCC Bah Bormanding Nonglang ula pyntip ba ka District Committee ka la shim ia kane ka rai halor ka jingbthah na ka MPCC bad ka AICC, kiba pyntip bala sospon haduh 6 snem ia u Bah Gabriel.
Ka DCC kala pdiang sngewbha ruh ia ka jingwan iasoh biang u MDC barim ka Rambrai-Jyrngam Bah JTS Thongni bad kala thung ia u Bah Fourteenson Lyngkhoi kum u General Secretary ka DCC, u ban khmih ia ka Mawshynrut Block Congress Committee.
