Ki Kynthei trai jaka bad ki shnong ki thaw ki long kongsan ia ka rep ka riang kaba neh
Shillong, Jylliew 26: Ki Nongialam, ki Nongthaw Policy, ki Nongwad Bniah bad ki Nongrep na kylleng ki ri kila iakynduh lang ha Nongbah Shillong ha ka sngi Thohdieng, ban iashimbynta ha ka International Conference on Women Farmers and Sustainable Organic Agriculture, ban buh ia ka jylla Meghalaya ha ka kyrdan kaba long pdeng jong ka jingiatai ha ka pyrthei ha ka kam rep kaba lamkhmat da ki kynthei, ka jingshngain ha ka jingpynmih ia ki marbam bad ka rep ka riang kaba iai neh.
Ha kane ka jingialang kaba ar sngi, kaba la pynlong da ka Department of Agriculture and Farmers’ Welfare jong ka Sorkar Meghalaya ryngkat ka jingiatreilang bad ka IFOAM – Organics Asia, ka long kum shi bynta ban rakhe ia ka United Nations Year of the Woman Farmer 2026. Ki nongmihkhmat na ki kynhun bapher kum ka KfW bad IFOAM, ryngkat bad ki nongthaw ia ki polisi treikam, ki riewstad bad kiba donbynta lang ha ka kam na ka liang ka jingpynmih ia ki marrep ki bym ai dawai kila wan iashimbynta ha kane ka jingialang.
Pleased to attend the International Conference on Women Farmers and Sustainable Organic Agriculture in Shillong.
In Meghalaya, women have always been at the heart of agriculture and grassroots movement. Our matrilineal society has empowered generations of women as custodians of… pic.twitter.com/Cld2BUWDVx
— Conrad K Sangma (@SangmaConrad) June 26, 2026
Haba kren ha ka jingialang plie kaba la long ha State Convention Hall, u Myntri Rangbah ka jylla u Conrad K. Sangma ula pynpaw ba ka jylla Meghalaya ka don ia ka jinglong kaba kyrpang ha kaba iadei bad ki kynthei, ha kaba ki kynthei ki don ia ka bynta kaba khraw kum ki nongiada ia ka khyndew ka shyiap bad ia ka rep ka riang bad ula ong, ba ka jylla ka lah ban ai ia ka ka nuksa kaba kongsan ia kiba thaw ia ki polisi treikam ha kaba iadei bad ka kam rep kam riang ha ka pyrthei baroh kawei.
“Ka jinglongtrai ka pynlong ban don ia ka jingkitkhlieh bad ia ka jingpynneh pynsah” ong u Sangma bad ka bynrap ba ka jingmad jongka Meghalaya ka lah ban long kum ka bynta kaba lah ban pule bniah bha ha kaban sngewthuh ia ka jingiadei hapdeng ki trai jaka, ka jingpynmih bad ia ka rep ka riang kaba iai neh.
U Myntri Rangbah ula ong, ba ka jylla kala pynlut ha kine ki 8 snem ha kaban tei ia ka jinglong jingman kaba iadei bad ki nongrep bad ka kam rep kam riang, da kaba banjur ha kaban pynkup bor ia ki kynthei, ban pynkhlain ia ki Self-Help Group bad ki kynhun jong ki nongrep bad ban kyntiew ia ki jaka treikam jong ki shnong ki thaw.
Haba banjur ia ka jingkongsan ban pynneh pynsah ia ka jingstad tynrai, u Sangma ula ong, ba kane kadei kaba iahap bha bad ka rukom leh ha ka rep ka riang tynrai bad ka jingpyndonkam ia ki kor teknoloji kane ka juk ba mynta ban kyntiew ia ka jingpynmih ha ryngkat bad ka jingiada ia ka jingriewspah kaba la don naduh hyndai ha ka thaiñ.
Ula ialap ruh ia ka jingdonkam ban peit ia ka thain shatei lammihngi kum ka thain jong ka jingdon ia ka sawdong sawkun jong ka mei mariang bad ka kolshor ban kyntiew ia ki sienjam kiba seisoh, ban khring ia ka jingwan bei tyngka bad ban thaw ia ki lad kiban wanrah jingkylla ha ka pyrthei.
Ki nongpyniaid kila kdew ba ki kynthei bad longkmie ki don ia ka bynta kaba khraw ha kaba iadei bad ka bor jong ka jingtrei ha ka kam rep kam riang hynrei kila iai bteng ban mad ban ioh ia ka jaka, pisa, kor teknoloji, ki iew ki hat bad ha kaban shim ia ki rai kiba kongsan. Kane ka jingialang ka thmu ban pyninam ia ki sienjam kiba la seisoh bad ban pynkhlain ia ka jingkular ban pynkup bor ia ki kynthei kiba dei ki nongrep.
Ka jingialang kala banjur ba ka Meghalaya kala nang paw kum ka nongialam ha ka rep ka riang kaba iai neh bad ka bym pyndonkam dawai bad ka don ruh ia ka lad ban pynlong ia ki kynthei kum ki nongialam kiba hakhmat na ka bynta ka jingseisoh ha ka thain nongkyndong bad na ka bynta ka bha ka miat jong ka shnong ka thaw.
Kane ka jingialang kan sa pynmih ruh ia ka jingpynbna lang ne ka ‘Joint Declaration’ ban ioh ia ka jingithuh kaba iar, jingkyrshan, jingbei tyngka ia ki nongrep kynthei kum ki nongsynniang kiba kongsan tam sha ka jingshngain ha kaj ingpynmih ia ki marbam, ka jingkyrda ia ka jingkylla ka suinbneng bad ka roi ka par kaba iaineh.
