Shillong, Nailur 20: U Lamphang ka Iingdorbar Thaw Ain ka Jylla Thomas Sangma ha ka sngi Balang, ula rai ban weng noh (Expunge) ia ki jingkren u Dr Mukul Sangma na ka mat iakren (proceedings) jong ka Iingdorbar ha ka sngi Ba-ar, kaba u kynnoh ia u Myntri Rangbah ka Jylla Conrad K Sangma ba u don jingiadei ba iajan bad u kingpin khaii droks ba na Mizoram.
U Lamphang ula pynpaw ba ka Iingdorbar Thaw Ain ka Jylla ka dei kaba la tip da baroh ba ka Iingdorbar ba don burom tam hapoh ka Ri baroh kawei bad kumta ym dei ha kane ka Iing ban iakhot kyrteng ne pynmih ia ki jingkynnoh khlem da lah ban ai ia ki sakhi satar kiban kyrshan ia ka jingkynnoh.
“Nga la batai ia kane ka kam haba kdew ia ka rule 279a…ki jingkynnoh ki hap ha kane ka rule…bad kat kum ka rule 304, la aibor ia u Lamphang ban weng ia ki jingkren na ka mat…halor kane, lada mih ki jingartatien, ka rai jong u Lamphang kan dei kaba khatduh bad kumta, nga wengnoh ia ka jingkren u Dr Mukul Sangma kum ka jingpynkhein ia ka rule 279 a…”.
Kane ka rai jong u Lamphang kala mih hadien ba u Symbud Myntri Rangbah Bah Prestone Tynsong ula kyrpad ban pyndam noh ia ka jingkren jong u Dr Mukul.
U Bah Prestone ula kyrpad ruh ia u Dkhot na Songsak ban kiar ha kaban pynmih ia kum kine ki jingkynnoh da kaba pynshong nongrim tang na ka dur.
Haba iasaid ia ki jingthmu haba kren ia kine ki kyntien ha ka jingiatai ia ka motion hynnin ka sngi,u Dr Mukul ula ong ba u Symbud Myntri Rangbah ula pynman bakla ia ka jingmut jong kane ka jingkren.
“U briew uba la paw kyrteng ha ki National mdia u dei uba shah kynnoh ym uba la shah pynngat kam bymman. Nga khlem pynmih ia ka jingkynnoh halor kano kano ka kam bymman bala leh da kaba kdew ia kaei kaba paw n aka dur. Ha ka jingkren jong nga, nga la ong ba ngi dei ban phikir bha, ngi hap ban husiar iano ba ngi iadei haba ngi bat kam ha ka Ophis kaba la aibor da ka riti synshar” ula ong.
“Nga la pynpaw ruh ha ka jingkren jong nga ba nga ai jingmut ia u CM ba un kiar ialade na ka jingdon jingiadei bad kumkine ki briew ia kiba ym lah satia ban tip ki dei kiei. Ka shong ha u CM ban buh ia ki ha ka jingpeitngor, kane ka dei kaba nga ong. Hynrei mynta balei ba Sorkar ka khuslai bad theh umsyep ban iada ia ka” ong u Dr Mukul.
Haba pynpaw ia ka jingsngewkhia ba ka kyrteng jong u kala mih sha ka jingiatai ka bym idonkam, u Myntri Rangbah Conrad K Sangma ula bthah ia u Nongialam ka AITC ban wanrah ia ki jingshisha halor ka case jong une u briew.
“Ai ba u dkhot (Dr Mukul) un sei madan ia ki jingshisha halor kane ka case, mynno kane ka case ka jia bad shaei kala poi kane ka case mynta” ula ong.
“Ka mat ka long ba lada phi dei ban pyniasnoh ia artylli ki dot ha kat kaba phi kwah ban sngewbit ia phi bad pynman kat kaba phi sngewmon bad wanrah pat hapoh ka Iing tang ban ialam bakla ia baroh, kane ka dei kaba ngi pyrshang ban ong” ula bynrap.
“Hato u tip shaphang kane ka case? Hati u tip ba kane ka case kala dep kut? Hato u tip ba ka Iingkashari kala dep ai ka hukum jong kane ka case bad ong ba une u briew ula long laitluid….ai ba un wad jingtip halor kane” ong u Conrad.
 ia ki jingkren u Dr Mukul Sangma na ka mat iakren (proceedings) jong ka Iingdorbar ha ka sngi Ba-ar, kaba u kynnoh ia u Myntri Rangbah ka Jylla Conrad K Sangma ba u don jingiadei ba iajan bad u kingpin khaii droks ba na Mizoram.){kind=link}