Shillong, Nailur 22: U MDC barim ka Jaiaw Constituency Bah Martamlin Pyrbot hynne ka sngi palei, ula pynbna ba ula weng noh ialade na ka jingpan tiket na ka seng BJP ban iakhun iaka elekshon MLA 2023 na North Shillong Constituency hynrei yn ai jingkyrshan bad iatreilang noh bad u Bah Micheal Kharsyntiew uba pan iaka tiket BJP na ka Constituency..
U Bah Martamlin u la ong, ba ym kwah ban don ka jingiapait iapra hapoh ka seng BJP kumta u lashim iaka rai ban ym pan tiket shuh hynrei ban ai ka kti kamon kti ka diang ia u Bah Micheal khnang ba ka BJP kan jop iaka elekshon.
“Nga lynga haba ki paidbah ki kylli mano ba ioh tiket bad nga sheptieng ioh ki paidbah ki phet noh shawei, namar ba nga ieid iaka seng, ngan len ialade da kaba ngan ym pan tiket shuh ban iakhun hynrei long katba long, ngan kyrshan ia u bah Mike” ong u Bah Martamlin haba iakren bad ki nongthoh khubor ha Shillong Press Club.
Katba u Bah Micheal Kharsyntiew u la ong, ba kila don ki khubor hamsaia ba ka BJP kala dep ban ai tiket ia uwei pat u kyrtong ban iakhun iaka elekshon MLA na North Shillong hynrei u la pynshai ba ka BJP haduh mynta kam pat pynbna mano ba ioh iaka tiket.
“Ka daw ba ngin iatreilang kadei ban wanrah iaka jingkylla ha ka North shillong bad ngi kwah ba ka BJP kan jop iaka elekshon na North Shillong. Nga kyrpad ruh ia u Bah JA Lyngdoh uba long u nongialam ka BJP uba la mih noh naka seng, ba yn ym iakhun iaka elekshon MLA hynrei ban ai lem iaka iatreilang ban pynthikna ba ka BJP kan jop na North Shillong Constituency” ong u Bah Micheal.
U Bah Micheal u la ong, lada jia ba ka BJP kam ai tiket ia u ban iakhun iaka elekshon, yn sa shim iaka rai bad ki nongkitkam ka BJP Mandal jong ka Constituency ia kaei kaba kin leh.
Lah ban ong ba baroh shi katta ki la don 5 ngut kiba la pan tiket na ka BJP ban iakhun na ka Shillong North kata u Bah Rocky Hek bad u Bah JA Lyngdoh kiba la mih noh naka seng BJP, u Bah Martamlin Pyrbot uba la pynbna mynta ban ym pan tiket shuh bad kiba sah mynta haka jingiakhun ban ioh iaka tiket BJP ki kynthup ia u Bah Micheal Kharsyntiew bad u Bah MH Kharkrang u Heh Pulit IPS.
