Shillong, Naitung 15: Ka All Meghalaya SSA Teachers Association (AMSSATA) ryngkat bad ka All Garo Hills SSA School Teachers Association (AGHSSATA) hynne ka janmiet kila weng noh ia ka jingiakhih hadien ba ka Chief Secretary kala khot ia ki ban iakren ia ki jingdawa ha ka 18 tarik Naitung.
Haba iakren bad ki nongthoh khubor, u President ka AMSSATA Bah Last Marngar ula ong ba ki Nonghikai SSA ha kylleng ka Jylla kila bitar ia ka jinglong mynthi jong ka Sorkar Jylla namar ha kine ki san bnai bala leit noh, ki Nonghikai kim shym la ioh tulop satia.
U Bah Marngar ula ong ba ki Nonghikai SSA kila iakynduh ruh ia u Secretary ka Tnad Education Bah R Rapthap hynrei kane ka jingialang kam shym long satia kaba seisoh namar kam shym la don satia kano kano ka jingkular na u Secretary haba iadei bad ka tulop ba dang pynsahteng jong kine ki 5 bnai bala leit noh.
“Watla ka jingialang bad u Secretary ka Tnad Education kam long kaba sei soh, hynrei ngi sngewnguh ba ka Chief Secretary kala khot ia ngi ban iakren ha ka 18 tarik Naitung bad ia mynta, ngin weng noh ia ka jingiakhih bad ngin sa shim rai biang hadien ka jingialang bad ka Chief Secretary ban long la sngi nyngkong” ong u Bah Marngar.
U Bah Marngar ula ong ba ha ka jingialang bad u Secretary ka Tnad Education, la iakren sani bha halor ka tulop ba san bnai bad ka errear ba dang sah hynrei kam shym la don satia kano kano ka jingkular na une u Heh Ophisar.
“Lada kaei kaba mih na ka jingialang bad ka Chied Secretary kam long kat kum ka jingdawa jongngi, ngin sa pynsdang biang ia ka jingiashong kyllain mungor khlem buh por pyrshah ia ka jingbym lah jong ka Sorkar Jylla ban pyntreikam ia ki jingdawa” ula bynrap.
