“Nga la pan ia ka kaiphod halor ka jingkawang bomb pynsat khmat”: Rymbui
Shillong, Risaw 07: Ki Nonghikai Contract kiba don hapoh ka lama jong ka Meghalaya Government Lower Primary Contractual Teachers’ Association (MGLPCTA) hynne ka sngi thohdieng, kila pynbna ban weng noh ia ka jingiakhih kaba la iaid shibnai hadien ba jingkular ba ioh na ka Sorkar ban plie lad ia ki ba kin ialeh biang ia ka eksamin MTET.
Ia kane la pynbna da u Nongialam ka MGLPCTA Bah Birbor Riangtam hakhmat ki nonghikai kiba shong ha khyrdop ka Secretariat, hadien ka jingleit sha ka miej iakren bala khot da u Myntri ka Tnad Pule Puthi ka Jylla ma Lahkmen Rymbui.
U Bah Birbor ula iathuh ba u Myntri ka Tnad Pule Puthi ula ai ka jingkular ba ka Sorkar kan shah ia ki Nonghikai Contract ba kin ialeh biang ia ka eksamin MTET khlem da khein ia ka rta haba pynjynsur ruh ia ka eksamin na ka bynta jong ki.
Kat kum ka jingong jong u, kane ka long ruh halor ka hukum jong ka Iingkashari Supreme Court kaba shah ia ki ban ialeh ia ka eksamin MTET.
U Bah Birbor u ong “Watla ki nonghikai kim pat ioh pdiang iaka hukum ka Supreme Court hynrei ki nonghikai ki shaniah ba kane ka hukum kan long katkum ka jingkren u myntri ka tnat pule ba yn shah ia baroh ki nonghikai kontrak ban ialeh iaka eksamin MTET”.
Haba pynthikna ia kane, u Myntri ka Tnad Pule Puthi ula pyntip ba ki nonghikai Contract kin ioh ia ka lad ban iakhun ia ka eksam MTET khlem da khein shuh ia ka rta bad ba yn pynjynsur ruh ia ka eksam na ka bynta jong ki.
Halor ka jingkawang bomb pynsat khmat, u Myntri kam Pohiing ula pyntip ba ula pan ia ka kaiphod na ki bor District ban tip ia kaei kaba jia khamtam ba ki don arliang ki khana halor kane ka huri hura.
“Ki bor District kila pynjari ia ka kyndon 144 CrPC bad kim shym la ai jingbit ban iaid paidbah.. ta ka daw nga la pan ia ka kaiphod bad ngin sa leh ia kaba dei ban leh” ula ong.
Lah ban kdew hangne ba ki Nonghikai Contract kila sahmiet hakhmat ka khyrdop jong ka Secretariat ban dawa thung biang ia ki ha ka kam n aka Sorkar.
Kine ki Nonghikai kila iakhih naduh ka 7 tarik Nailur hakhmat ka Shillong Civil Hospital bad hynnin ka sngi palei, kila rai ban iaid paidbah sha Secretariat ha ryngkat bad ki bahaiing hasem. Ki Pulit kila pyrshang ban khang lynti ia ki hynrei kala mih ka jingiakhynniat bad mih ka jingiapyni bor. Ki Pulit kila kawang haduh saw tylli ki bomb pynsat khmat ban pyn saphred ia ki nonghikai.
