Imphal, Nailar 06 : Ki arngut ki MLA ka Kuki Peoples’ Alliance (KPA) kila weng noh ia ka jingkyrshan na ka Sorkar ba ialam da ka BJP ha Manipur, kaba khlieh da u Myntri Rangbah N Biren Singh.
Haba phah ia ka shithi sha ka Lat ka Jylla Manipur Anusuiya Uikey, u President ka KPA Tongmang Haokip ula ong “Hadien ka jingbishar ba bniah halor ka jinglong jingman ha Jylla, ka jingkyrshan ia ka Sorkar ka Manipur ba ialam da u Myntri Rangbah N Biren Singh kan ym sngew don jingmut shuh”.
Namar kata, iaka jingkyrhan jong ka KPA ia ka Sorkar Manipur la pynbna ban weng noh bad ban khein kum kaba la iap.
U Nongialam ka KPA W L Hangsing ula ong ba ka party kala phah ia ka shithi sha ka Lat ka Jylla lyngba ka email.
Ki Nongialam ka KPA kum ki paralok jong ka Sorkar National Democratic Alliance (NDA) ba ialam da ka BJP, kila leit iashimbynta ha ka jingialang ka NDA ba long myn ha ka 18 tarik Naitung ha New Delhi.
Da kane ka jingweng noh ki arngut ki MLA ka KPA ia ka jingkyrshan ba kynthup ia u Kimneo Hangshing bad Chinlungthang, ka Sorkar BJP kan ym pat shah ktah satia.
Ha ka Iingdorbar ba 60 ngut ki MLA, ka BJP dalade ka don haduh 32 ngut ki MLA katba ka NPP ka don 7 ngut, ka Janata Dal (United) ka don 6 ngut, ka Naga Peoples Front ka don 5 ngut bad arngut ki MLA shimet kiba kyrshah ia ka Sorkar BJP.
Lah ban kdew ba 10 ngut ki MLA kynthup ia 7 ngut ki MLA ka BJP kila dawa ban phiah noh la ka jong ia ka bor synshar khadar (ba syriem la ka jong ka Jylla) sha ki jaka jong ki paid riewlum.
Ka BJP bad ki kynhun bapher bapher kynthup ka Coordinating Committee on Manipur Integrity (COCOMI) kaba dei ka kynhun ba hehduh jong ki Meitei, kila pyrshah jur ia kane ka jingdawa ban phiah noh la ka jong ia ka bor synshar khadar.
