Shillong, Risaw 30 : Ka Sorkar Jylla lyngba ka Tnad Animal Husbandry & Veterinary, kala weng noh ia ki jingpyrrkhing na ka jinglynshop ka jingpang African Swine Flu (ASF) ha ki lai tylli ki farm ri sniang ba don ha ka Jylla.
Kine ki farm ri sniang ki kynthup ia kawei ha Nongkasen, West Khasi Hills, ka Medium Farm ha Dalu, West Garo Hills bad ka Mawtneng Nongthymmai Kyrdem, Ri-Bhoi District.
Kane ka jingweng ia ka jingpyrrkhing kala wan hadien ba kine ki farm kila pyndep ia ka jingpeit thuh ba 45 sngi naduh ka jingiohpang/iap khatduh ki sniang.
Hynrei khnang ban khang ia ka jingsaphriang kane ka jingpang, kine ki shnong kin hap ban bud ia ka bio-containment, bio-security bad kiwei kiwei ki lad jingiada.
