Shillong, Naiwieng 17 : Ka National People’s Party (NPP) hynne ka sngi U Blei, kala shim rai ban weng noh ialade na ka jingkyrshan ia ka Sorkar BJP ba ialam da u Biren Singh ha Jylla Manipur.
U President ka NPP bad Myntri Rangbah ka Meghalaya Conrad K Sangma, ula phah da ka shithi sha u President ka BJP Jagat Prakash Nadda ban pyntip ia kane ka rai ban sangeh kyrshan ia ka Sorkar u Biren Singh.
U Conrad ha kane ka shithi ula kynthoh “Ngi don ka jingsngew ba ka Sorkar Manipur hapoh ka jingialam u Biren Singh ka la pheil (ym lah) ban pynbeit ia ka jingiakynad bad ban wanrah pat ia ka suk ka sain ha ka Jylla”.
Kane ka rai jong ka NPP kala mih tang shisngi hadien ka jingshah hiar thma ki Iingsah jong ki Myntri Sorkar bad ki MLA ka Manipur ha ki paidbhur hynnin ka sngi Saitjain.
Ka jingkynad ha Manipur kala thnem biang puk ha kylleng ki bynta ka Jylla Manipur khamtam ha Imphal Valley hadien ka jinglap ia ki 3 tylli ki metiap jong ki kynthei bad ki khynnah ha Jiribam District ka Manipur.
“Ka NPP ka kwah ban pynpaw ia ka jingsngewkhia halor ka jinglong jingman ka suk ka sain ha Manipur. Ha kine ki khyndiat sngi, ngi la iohi ia ka jinglong jingman kaba la nang synjor ha kaba bun ki mynsiem briew kila duh noh bad ki briew ha kane ka Jylla kila mad ia shibun ki jingeh” ong u Conrad ha ka shithi.
“Haba khmih ia kane ka jinglong jingman mynta, ka NPP kala rai ban weng noh ialade na ka jingkyrshan ia ka Sorkar ba ialam da u Biren Singh ha ka Jylla Manipur, ka ban treikam mardor” pynkut u Conrad.
Lah ban kdew hangne ba ka NPP ka don haduh 7 ngut ki MLA ha ka Iingdorbar Thaw Ain ba 60 ngut ki dkhot ka Jylla Manipur.
Ka BJP kaba bat ia u lakam ka jingsynshar ka don haduh 37 ngut ki MLA tang nalade kaba la tam lypa ia ka 31 ban thaw Sorkar.
Ka BJP kala ioh ruh ia ka jingkyrshan la ioh ia ka jingkyrshan na ka Janata Dal (United) kaba don uwei u MLA, na ka Naga People’s Front (NPF) kaba don 5 ngut ki MLA bad 3 ngut ki MLA shimet.
 hynne ka sngi U Blei, kala shim rai ban weng noh ialade na ka jingkyrshan ia ka Sorkar BJP ba ialam da u Biren Singh ha Jylla Manipur.){kind=link}