Shillong, Iaiong 29 : U Symbud Myntri Rangbah ba khmih ia ka Tnad Home (Police) Bah Prestone Tynsong ha ka sngi Ba-ar, ula pyntip ba ia ki bor Pulit la weng noh na phyllaw ka North Eastern Hill University (NEHU) hynnin ka miet hadien ba peit thuh ia ka jinglong jingman ha katei ka skulbah.
Haba kren sha ki nongthoh khubor, u Bah Prestone ula ong “Ngi la dep ban weng ia ki bor Pulit hynnin ka miet hadien ba peit thuh ia ka jinglong jingman bad hadien ba iakren bha bad ka In-charrge jong ka NEHU Campus”.
Ka NEHUSU kala pynbna ia ka jingsangeh shongklas ba khlem pud bad pynlong ruh ia ka rally bad ka signature campaign ban pyrshah ia ka jingkem ia u President ka NEHUSU Sandy Sohtun bad ka jingwanrah ia ki bor Pulit hadien ka jingshah shoh u Assistant Professor ka Tnad Hindi Dr Alok Singh.
Ki samla pule kila pynrem jur ia ka Tnad Pulit halor ka jingwanrah ia ki Pulit shapoh ka phyllaw ka University khlem ka jingbit na ki bor ba dei khmih.
Haba kylli, u Bah Prestone ula ong ba kam long kaba donkam ia ki Pulit ban pan jingbit ba kin rung shapoh ka phyllaw jong kano kano ka Ophis ne jaka pule ka Sorkar Pdeng ne Sorkar Jylla namar baroh ka shong ha ka jinglong jingman.
“Kam long kaba donkam ban pan jingbit lada mih kano kano ka jingjia kaba ngi hap ban leh eiei. Kumta, ngam iohi ba dei ban da ioh jingbit na ki borkhmih bad phi tip bha ba ka Sorkar ka shimkhia bha halor ka jingshngain jong baroh khamtam ki samla pule, ki nonghikai bad mano manor uh. Kumta, ngam ong ba ngi donkam ban da ioh jingbit ban rung hangno hangno ruh la ka dei ha ki shnong ki thaw ne ki phyllaw jong kino kino ki Ophis ne jaka pule ka Sorkar Pdeng ne Sorkar Jylla” ula bynrap.
Ha kajuh ka por, u Symbud Myntri Rangbah ula kyntu ia ki samla pule ba kin ailad ia ka jingtohkit halor ka jingshah shoh u Nonghikai, ba kan iaid haduh ban da dep.
“….Ngi la dep phah ia ka khubor kaba shai- ngi la kem ia u President ka NEHUSU haba pynshong nongrim na ka ejahar. Kumta, ailad ba ka jingtohkit kan dep bad hadien bala dep kane, baroh kila long laitluid ban leit sha Iingkashari bad ka Iingkashari kan sa shim ia ka rai la kan ai bah jamin lane ym ai jamin. Kumta, nga kyrpad ia ki samla pule ba kin ailad ba ka jingtohkit kan dep” ula ong.
Haba kyntu ia ki samla pule ba kin kiar na kaba shim ia ka ain hala ka jong ka kti, u Bah Prestone ula ong “Ngim lah ban shu shim ia ka ain hala ka jong ka kti kumba phi tip ba ka dei kaba shisha kat kum ka ejahar ba u Professor ula shah shoh ha u President lane hano hano ruh, nga sngew ba ngi hap ban pynthikna ia ka jingshngain jong baroh kiba don ha Meghalaya”.
 Bah Prestone Tynsong ha ka sngi Ba-ar, ula pyntip ba ia ki bor Pulit la weng noh na phyllaw ka North Eastern Hill University (NEHU) hynnin ka miet hadien ba peit thuh ia ka jinglong jingman ha katei ka skulbah.){kind=link}