Shillong, Naitung 06 : U Symbud Myntri Rangbah bad National Vice President ka NPP Bah Sniawbhalang Dhar ha ka sngi Nyngkong, ula pynpaw ia ka jingsngewskhem ba ka party jong u kan jop ha ka elekshon shiteng samoi ban wan jong ka Shillong Lok Sabha, haba iathuh ba ka jingwan kyrshan jong ki briew ha Khasi-Jaintia ka long kaba jur bha.
Haba leit iarap na ka bynta u kyrteng ka NPP Dr DRL Nonglait, u Bah Sniawbha ula ong ba kaei kaba ki paidbah kila pynpaw kala shai bha ba kan iarap bha ia ka party katba ka elekshon ka nang jan.
“Katba ki sngi ki dang iaid, ka jubab na ki paidbah ha kylleng ka ri-lum Khasi bad Jaintia ka long kaba itynnad bha. Ka rukom ba ki briew ki wan iakynduh ia ngi, ka rukom ba ki briew ki iasoh sha ka NPP, ka rukom ba ki wan iashimbynta ha ki jingialang bad ka rukom ba u kyrtong u kren ia ki paidbah- ka I biang bha” ong u bah Dhar.
“Nga kwah tang ban jop” ula ong haba pynpaw ba ka result ka dei kaba kongsan bha ban ia ka jingtam ki vote.
“Nga don beit ia ka jingngeit ba ngin jop ia ka elekshon shiteng samoi. Bad ngam iakren halor ki nombor. Wat tang shi vote ban jop ruh kala biang eh. Nga kwah tang ban jop” ong u DyCM.
U Bah Sniawbha ula ainam ia ka jingwan tuid u paidbah ban kyrshan sha ka jingtrei jong ka Sorkar MDA ha kine ki phra snem bala leit noh.
“Ka daw hi ka long ba ki briew kila sngewthuh bad iohi ba ka Sorkar kala leh shibun ki kam pynroi. Shibun ki kam lah dep ban pyntrei ha kine ki phra snem bala leit. Kane ka dei kawei na ki daw ba nang wan tuid u paidbah ban kyrshan” ula ong.
“Ki paidbah mynta kila sngewthuh ha kylleng ka Jylla ba ngi hap ban vote ia ka NPP” bynrap u bah Sniawbha.
Ka shuki MP ka Lok Sabha na Shillong kala lait thylli hadien ka jingkhlad noh u MP Dr Ricky AJ Syngkon.
Ka Election Commission kan dang ban pynbna ia ka tarik jong kane ka elekshon shiteng samoi.
