Shillong, Rymphang 18 : Ka jingiatai nia kaba jur kala mih ha Iingdorbar Thaw Ain hapdeng u Myntri Rangbah ka Jylla Conrad K Sangma bad u Nongialam ka Liang Pyrshah Mukul Sangma halor ka jingpyntreikam ia ka Inner Line Permit (ILP) ha Jylla.
Haba u Mukul Sangma ula iai ban ia ka jubab hooid-ne-em halor ka jingkylli la ka Sorkar kala sangeh ban tynruh ia ka ILP bad ka Sorkar Pdeng, u Conrad ula ieng ban pyrshah da kaba ong “Ai ba ngan jubab. Sngewbha wat pynthut. Kane ka long ka bym dei. Haba nga ai jubab, u LO um dei ban pynthut”.
U Mukul Sangma ula iai ban ia ka jubab kaba beit, kaba la pynlong ia u Myntri Rangbah ban kynthoh : “Lada u LO u kwah ia ka jubab, ngan ai ia ka jubab. Ngan ai ia ka jubab kaba bniah namar ka dei ka mat kaba kyllain bha. Phi don ka jing sngewtynnad ban wanrah ia kane ka mat hynrei phim don pat ia ka jingiai shah ban sngap ia ka jubab. Ka jinglong ba kumno kane? Nga burom ia ka jingshimkhia jong phi hynrei long ruh kiba iai shah ban sngap ia ka jubab”.
U Conrad ula bteng “Ngan ai ia ka jubab ia kaei kaba nga sngew ba ka long kaba dei. Tang namar ba u ong ba ka dei ban ong hooid ne em, kam long satia kumta. Ngan ai ia ka jubab khnang ba ka Iingdorbar kan hun. Nga la ai jubab kham hashuwa bad nga jubab biang ba ngi la khmih ia ki lad jingiada, kam dei shaphang ka ILP, kam dei shaphang ka MRSSA, kam dei shaphang ka Immigration and Foreigners Act, ka dei shaphang ka jingwanrah ia ki lad jingiada kiba lah ban pyrrkhing ia ka jingwan rung ki mynder ri bad ban lap ia ka lynti ha kaban khanglad ia ka jingwan rung beain ki mynder”.
Ula bynrap “Ka Sorkar kala buddien ia ka ILP. Ngi la iakynduh ia u Myntri kam Pohiing la bun sien. Ka Sorkar ka dang iai bteng ban buddien ia ka bad ngi ioh beit ia ka jubab ba dang bishar ia ka….Ngi la buddien kat haba don ka lynti. Ngi la kut jingmut ban pynthikna ban gin lah khanglad ia ka jingwan rung bein ki mynder, la ka long ka ILP lane ka Immigration and Foreigners Act, ngin ia buddien beit”.
U Myntri Rangbah ula kynthoh ruh ia ka Sorkar ba hashuwa da kaba ong “Ka Sorkar ba hashuwa kala dei ban buddien ia ka hynrei ka khlem leh satia. Balei ba kim khmih ia kane ka bynta ruh, hynrei dei ka Sorkar jong ngi kaba la leh ia kane”.
 ha Jylla.){kind=link}