Shillong, Rymphang 19 : U President ka National People’s Party (NPP) Meghalaya bad Symbud Myntri Rangbah Bah Prestone Tynsong ha ka sngi Balang, ula kyntu ia ki paidbah ka Sohiong Constituency ba kim dei ban pynshlur ia ki MLA ba kin “Bam armaloi” bad jied pynban ia u kyrtong ka party Bah Samlin Malngiang khnang ba un long u nongrahktien ka roi ka par jong ka Constituency hadien ka elekshon KHADC, ban long la 21 tarik Rymphang.
Haba kren ha ka rynsan ialap elekshon ha shnong Sohiong, u Bah Prestone ula ong ba ki paidbah ka Sohiong kila babe ba kila rai bakla ban jied ia u nongmihkhmat ha u snem 2023.
“Kumta, nga sngew skhem ba ngin nym leh ia kajuh ka jingbakla sa shsien bad ban gin ai noh ia jingkyrshan ba pura ia u Bah Samlin namar ngim dei ban ailad ia ujuh u briew ban bat ia artylli ki kam kata kam MLA bad MDC” ula ong haba kren halor u MLA ka UDP Bah Synshar Kupar Roy Lyngdoh, uba mih ban iakhun ia ka elekshon MDC na Sohiong.
“Kam dei ba ngi kynthoh iano iano hynrei nga kwah iathuh ia phi ba ha u 2023, nga la jop kum u MLA na Langkyrdem constituency bad ha u 2004, nga la jop ruh kum u MDC na Langkyrdem-Laitkroh. Ha kine ki san snem ba nga long MLA bad MDC bad ruh kum u Myntri Sorkar, nga sngewthuh ba kam long kaba suk ban pynbiang tarajur. Ka dei hadien kane ba nga la rai ba ngan nym bat shuh ia artylli ki kam” ula ong haba bynrap “Nga kynmaw ba u Bah Samlin ruh ula jop ia ka elekshon MLA(ha u 2018) ula rai ban aiti noh ia ka jingkitkhlieh sha uwei pat u briew ban long MDC. Kane ka dei ka kam kaba dei eh ban leh”.
“Ki lah ban pynksan laiphew jait hakhmat jong phi hynrei ka dei ka bym don jingmut haei haei ruh. Sngewbha wat nym leh bakla shuh namar lada u MLA jong phi u poi hospital, wat ai ba u MDC ruh un poi thiah hospital lang” ula bynrap.
Haba kyrpad ia ki paidbah ban jied ia u Ban Samlin Malngiang, u Bah Prestone ula ong ba ki paidbah ka Sohiong ki dei ban long kum ki paid ka Ri-lum Haro, kiba la stad ban jied ia ka roi ka par.
“Ki paid Garo ki stad bha haba poi sha ka kam jied nongialam. Kin khmih shuwa ia ka party, kaba ialam ia ka Sorkar. Ka NPP kala jop bun kput bha ha ka elekshon shiteng samoi ha Gambegre namar ki paidbah ki kwah ia ka roi ka par bad ki tip ba ka dei tang ka party ba synshar kaba lah ban pynurlong ia kane. Kumta, nga kylli ia ki paidbah ka Sohiong, hato phim kwah ba u pipe ka roi ka par un wan poi sha ka constituency jong phi, lada hooid, to ai ia ka rai jong phi sha ngi. Ka UDP khlem pep, ka dei ka paralok ba iatreilang bad ka NPP kaba ialam ia ka Sorkar” ula ong.
Nalor kane, une u Nongialam ka NPP ula iathuh lypa ba kiwei ki seng sain pyrthei kin hap ban kyrshan jong ka NPP ha KHADC bad JHADC hadien ka 24 tarik u Rymphang.
“Ngin ioh ia ka jingjop ba bun paid eh ban thaw ia ka EC ha baroh artylli ki ADC-ka KHADC bad JHADC bad kiwei ki seng sain pyrthei kin hap ban kyrshan biang ia ngi sa shisien. Sa peit hadien ka 24 tarik Rymphang, kin sa wan sha ngi ban ai jingkyrshan” ula ong.
“Namar kata, nga kwah ban iohi ba u Bah Samlin un jop ha kane ka elekshon namar un sa long ruh u nongrahktien ka roi ka par jong ka constituency ban pynthikna ia ka jingtuid ki kam pynroi na Secretariat sha ka constituency jong phi” kular u Bah Prestone.
 Meghalaya bad Symbud Myntri Rangbah Bah Prestone Tynsong ha ka sngi Balang, ula kyntu ia ki paidbah ka Sohiong Constituency ba kim dei ban pynshlur ia ki MLA ba kin “Bam armaloi” bad jied pynban ia u kyrtong ka party Bah Samlin Malngiang khnang ba un long u nongrahktien ka roi ka par jong ka Constituency hadien ka elekshon KHADC, ban long la 21 tarik Rymphang.){kind=link}