Shillong, Iaiong 04 : U General Secretary ka KSU samla Donald V Thabah, ula maham ia ka tnad Pulit ba kam dei shuh ban nang pynjynjar ne pyntyrha ia ki dkhot ka Seng halor ka jingjia Ichamati.
“Wat pynjynjar ne pyntyrha shuh ia ki dkhot ka Seng lem kumta, ka KSU kan ym lah ban shu sngap bad kan hap shim ia ki sienjam kiba lah ban ktah ia ka shongsuk shongshngain bad kiban pyntyrha kylla ia ki bor Sorkar” ula maham.
Une u Nongialam ka KSU ula kynthoh ia kane halor ka jingshah kem ki arngut ki dkhot ka KSU-South Khasi Hills bad ka jinghiar khynra shiteng miet jong ki Pulit, ia ki dkhot halor ka jingsuba ba ki donkti ha ka jingshah pyniap ki arngut ki bar jylla ha Ichamati, kaba jia myn ha ka 27 tarik Lber.
“Kane ka jingkem kam dei kaba ngi sngewphylla ne kaba dang long thymmai namar haba don kano kano ka jingjia naduh ki snem ba mynshwa hi, ngi lah tip beit ba kin pharep beit ia ka kSU bad kiban shah kem nyngkong kin dei ki dkhot ka KSU” ong u samla Donald.
“Wat lada dei ka huri hura para bar Jylla ruh, lada don u bar jylla ba mynsaw, kin mutdur beit ba dei ka KSU bad ki bor Sorkar kin phaikhmat nyngkong eh sha ka KSU” ula bynrap.
U samla Donald ula ong “Kampher lada long kumno kumno ruh hynrei ngin (KSU) ieng beit ha ka nongrim”.
Halor ka jingshah thwet ia u President ka KSU-SKH samla Reebokstar Diengdoh bad kiwei ki dkhot, u samla Donald ula ong “U samla Reebok bad ki dkhot kila leit tur hynnin sha Sohra Police Station bad aiti ruh ialade hynrei ka jingkylli ka mih balei ba kim kem pat ia ki”.
Ula kynthoh “Ka jinghiar khynra shiteng synnia ia u Reebokstar imat hato ki don iaka jingthmu ym ban kem hynrei ban leh da kumwei ruh bad kane kadei kawei kaba ma ngi, ngi hap ban puson”.
