Shillong, Lber 11 : U Symbud Myntri Rangbah ba khmih ia ka kam Pohiing bad District Council Affairs (DCA) Bah Prestone Tynsong ha ka sngi Balang ula kynthoh ba ym dei ban pyniasnoh ia ka jingdawa Inner Line Permit (ILP) bad ka jingkulmar ba mih halor ka jingiashimbynta ki bar jylla ha ka elekshon GHADC.
“Phim lah ban pyniasnoh ia ka ILP namar kane ka jingkulmar kam dei halor ka ILP. Kane ka dei halor ka elekshon sha ka Iingdorbar ka Garo Hills Autonomous District Council” ula ban jur.
Haba iakren bad ki nongthoh khubor hadien ka jingialang, u Bah Prestone ula ong ba ki Sengbhalang ba iakih pyrshah ia ka jingthep kyrteng ki bar jylla kum ki kyrtong, kila pynsngew ia ka sur ba iadei bad ka jingangnud jong ki paidbah, hynrei ia kane ka sur ym dei pat ban pyniasnoh bad ka ILP namar “Kine ki briew ki dei ruh ki nongshongshnong ba dei hok jong ka Meghalaya bad India”.
Ula kyntu ia ki paidbah ban sangeh ka jingpyniasnoh na ki jingkulmar kiba la jia ha ki jaka sor jong ka them West Garo Hills ha kine ki khyndiat sngi.
“Ka mat ka dei kaba iapher bak ly bak. Phim lah ban pyniasnoh ia ka ILP namar kane ka dei jong ka elekshon ka GHADC. Ki Sengbhalang ki lah ban ong hynrei ai ba nga ruh ngan ong ba phi hap ban sngewthuh kawei, wat pyniakhleh ia ka bad ka ILP. Ki sengbhalang ki ong ban nym shah ia ki bar jylla ba kin iashimbynta ha ka elekshon, kim lah ban thep kyrteng kum ki kyrtong- Nga tharai kane ka dei ka jngkwah jong kine ki brew, kumta kumno phin lah ban pyniasnoh bad ka ILP”.
U Symbud Myntri Rangbah ula kren shai ruh halor ki bor treikam hapdeng ka Sorkar Jylla bad ki lai tylli ki Autonomous District Council (ADC).
“Ngim don hangne ban pyniaid ia ki ADC. Ngi don lai tylli ki ADC bad kumba nga ong, ki don la ka jong ka bor ban thaw ain, ki don la ka jong ka bor tha ka Judicial bad Executive-naba ki don la ka jong ka bor, balei ba ngin tuklar ma ngi na ka Sorkar Jylla. Kumta, ai ba ki dkhot jong ki District Council kin shim rai hi hala ki jong ki pud ki sam” ula ong.
Kane ka jingkynthoh kala mih hadien katto katne kynta ba ka Iingkashari kala rai pynduh ia ka jingpynbna jong ka GHADC halor ka syrnot Scheduled Tribe namar ka jingbym iaid kat kum ki kyndon treikam-ka hukum kaba u Bah Prestone u ong ba ka pyni ia ka jinglong laitluid ka Council.
U bah Prestone uba bat ruh ia ka kam Pohiing, ula pyntip ba ka jinglong jingman kala kham jai jai mynta ha ka thain.
“Ki briew kiba wan na kylleng ki bynta jong ka ri-lum Garo kila sdang ban leit phai biang shala ki jong ki jaka” ula ong haba bynrap “Khatduh, nga la thikna ba lehse naduh mynta shakhmat, ka jinglong ba jai jai kan sa wan phai biang”.
 Bah Prestone Tynsong ha ka sngi Balang ula kynthoh ba ym dei ban pyniasnoh ia ka jingdawa Inner Line Permit (ILP) bad ka jingkulmar ba mih halor ka jingiashimbynta ki bar jylla ha ka elekshon GHADC.){kind=link}