Leit hajir u Bah Dundee ha Shillong Sadar Police Station
Shillong, Naiwieng 14: U President ka Federation of Khasi Jaintia & Garo People (FKJGP) Bah Dundee C Khongsit, ula maham ia ka Sorkar bad ka Tnad Pulit ba kim dei ban niat jubor ia ki Nongialam ka Seng sha ka kynroh namar ynda poi ka kutlad, ym banse ban hap iatynjuh bor.
Une u Nongialam ka FKJGP ula pynpaw ia kane halor ka jingshah khot hajir jong ki Nongialam ka Seng, na ka jingmih ka huri hura ha ka rally bala pynlong da ka Seng halor ka jingkyrduh kam, kaba long myn ha ka 28 tarik Risaw.
U Bah Dundee hynne ka sngi nyngkong ula leit hajir ha Shillong Sadar Police Station halor ka jingpynngat case ki Pulit ia ka jingshah shoh ki briew bad pynjulor ki kali na rally ka seng ha ka thain Police Bazaar, Malki bad Dhankheti. Jan baroh ki Nongialam ba hakhlieh ka FKJGP kila shah khot hajir namar kane ka rally.
Haba iakren bad ki lad pathai khubor hadien ka jinghajir, u Bah Dundee ula ong ba kae ka jingkhot hajir kam don satia ka jingsngewpher ne sngewtieng namar kum ki Nongialam Sengbhalang, donkam ban shim ia ka jingkitkhlieh lada mih kano kano ka jingjia na ki prokram ba khot ka seng.
“Kum ki nongialam, watla ngi la shah pyngat ha ki kyndon aiñ bapher bapher, ngim don ka jingsheptieng namar kane ka jingtohkit ki pulit ka long kum ka jingai jinghikai ïa ki khynnah rit” ong u Bah Dundee.
“Hynrei ka sorkar bad ka tnat pulit kim dei ban ñiat jubor ïa ngi sha ka kynroh namar ynda la poi ka kut lat ngim ban se ban phai khmat ban ïa tynjuh bor da kiwei ki sien jam” ula bynrap.
Une u Nongialam ka FKJGP ula ong ba ka jingsaphriang jong ki video shoh briew ka dei ka daw ba shah khot hajir ki Nongialam ka Seng hynrei ka Seng kam sngewdiaw namar ym shym la don mano mano ba poi thiah sumar ha Hospital.
“Kane kadei tang ka jingpynksan jong u Supritendent of Police (SP) ka East Khasi Hills ba don kita kiba shitom jur bad ka seng kam pdiang satia ïa kane” ula ong.
Ha kajuh ka por, u Bah Dundee ula ong ba ka seng kan dang bteng ban pynlong ia ka jingdawa haba iadei bad ka jingbym iohkam iohkam jong ki samla ha ki tnad treikam ka sorkar bapher bapher.
“Ka sorkar kade ban kit khlieh kumno ban thaw ia ki lad ki lynti ban pynioh kam ïa ki samla hapoh ka jylla namar lada ka sorkar kam shim kano kano ka jingkitkhlieh, ka seng kam salia ban pynlong biang iaki jingiakhih paidbah nangne sha khmat” ong u bah Dundee.
