Shillong, Nohprah 11 : U Symbud Myntri Rangbah ka Jylla ba khmih ia ka tnad kam pohiing Bah Prestone Tynsong ha ka sngi Nyngkong, ula bthah ia ka Voice of the People Party (VPP) ba kan kiar na ka jingleh politics ia ka kam ba iadei bad ka jingpynkynriah ia ki 342 tylli ki Longiing ka Them Metor, Them Iew Mawlong sha ka jaka ba long trai da ka Shillong Municipal Board (SMB).
Kane kala mih shisngi hadien ba ka VPP kala pyrshah ia ka rai jong ka Sorkar ban nang ai shuh shuh ia ka jaka ha kaban pynkynriah ia kine ki Longiing na Them Metor.
Haba iakren bad ki nongthoh khubor, u Bah Prestone ula ong “Kito ki Nongialam kila pynrem iaka rai ba shim da ka Sorkar, ki dei kiba leh politics. Ka dei tang ka jingleh kai politics khlem da tip ia ki jingshisha, khlem da tip ia ka jingdon ki nongshongshnong ha katei ka jaka. Namar kata, ngam kwah ban iatai nia, ngam kwah ban pynlut por bad kum kine ki kam ba ki kren”.
U Bah Prestone ula ong “Haba ngi onng ba ngi donkam jaka biang sa 1.4 acre ka mut ba kane ka kam kam dei ban ai sha kine ki briew. Ia kane ka jaka yn aiti sha ka Shillong Municipal Board. Kam dei ba kin long trai ma ki namar ka jaka ka dei jong ka SMB. Kane ka dei kaba nga ong bad wat leh politics eiei. Lada phi donkam jingpynshai, wan bad iakynduh ia nga, ngan batai ia baroh kiei kiei”.
Haba pynpaw ba ka VPP kam dei ban shu ialam bakla ia ki paidbah, u Bah Prestone ula ong “Nga tharai katto kala biang. Balei ba ki dang iai kren kumtei?, Balei ba ki pyrshang ban ialam bakla ia u paidbah? Mynno ba ngi la ong ba ngi ai ia ka jaka sha ki?”.
“Ia kane ka jaka yn ai sha ka SMB bad ka SMB kan sa leh ia kaba donkam haba iadie bad ki nongtrei jong ka Board. Nga la iohi ia ka jingkren jong ki bad lada ngi aiti ia kane ka ishu sha ka VPP, kaei kaba kin leh haba kim tip ia u ‘A’ u ‘B’ bad kim tip eiei ruh em, ki shu pyrshang beit tang ban ialam bakla ia ki paidbah” ula bynrap.
U Symbud Myntri Rangbah ula ong “Sangeh noh katto kala biang. Ki paidbah ki sngewthuh kham bha bad nga kyntu ia kine ki nongialam ba kim dei ban sngewthuh bakla bad ban nym ialam bakla ia ki paidbah ka Jylla”.
