Nongstoiñ, Jymmang 12: U Bah Michael Thongni President ka seng Khasi Disability Association, West Khasi Hills, ula maham tyngeh kat kum ka ain RPWD Act, 2016 pyrshah ia kino kino ki briew kiba kren ne leh tohmet ia ki briew kiba don jingduna dkhot met hapoh ka District.
“Ka Seng mynta kan nym shu sngap shuh bad shu iai shah ia ka jingleh kren ne leh tohmet jong ki briew ba don jingduna ha ki dkhot met hynrei mynta ngim shim beit ia ka lynti kat kum ka RPWD Act, 2016” ong u Bah Thongni haba iakren bad ka Shlem.
Une u Nongialam ka KDA ula pynpaw ia ka jingbynniaw ba ki dang don ki briew kiba dang niewpoh ia kiba duna dkhot met ha ka imlang sahlng ha kum kane ka juk kaba la nang la stad bad bala shai.
“Ngi la ioh pdiang ia shibun ki jingthoh na ki briew kiba don jingduna ha ki dkhot met, kiba la pynpaw ia ki jingshem jong ki halor ka jingshah leh bym suidniew ha ka imlang sahlang watla ki long ki briew kiba tlot bor” ula ong.
Kat kum ka jingong jong u ki dang don bun ki jaka treikam jong ki bor Sorkar kum ki Ophisar Sorkar, ka MePDCL, ki Hospital bad ki Bank kiba dang khein bein ia ka jingeh jong ki briew ba duna dkhot met, da kaba phah ieng lain ia ki bapli watla kila pynithuh ialade da ka ID ba ki don.
“Ngi maham tyngeh ba nangne shakhmat, ki jaka treikam paidbah kim dei shuh ban phah ieng lain ia kibriew ba duna dkhot met haba ki wan donkam sha ioh ia ka jingshakri jong ki” ula ong.
U Bah Thongni ula kyntu ia ki briew ba duna dkhot met ba kin pyndonkam ia ka kor ka juk mynta (mobile phone) ha kaban ring video lada ki shem ia kum kine ki jingjia bad ban phah ia ki video sah ka seng ba kan leh ia kaba donkam kat kum ka lynti kong ka ain.
Ha kajuh ka por, u Bah Thongni ula dawa ia ka District Selection Committee (DSC) bad ka Meghalaya Public Selection Commission (MPSC) ba ki dei ban pyntrei hok ia ka bhah iohkam iohjam jong ki briew kiba don jingduna ha ki dkhot met.
“Naduh u snem 2011 kila kut tang ha ka jingkyrpad bad ki jingkren bad ngi la buh bha ruh ïa ki sakhi naduh u snem ba ngi la sdang ki jingïakhih hynrei mynta ngin nym ailad shuh ia ka jingleh bymhok pyrshah ia ngi”, ong u Bah Michael.
U Bah Thongni ula kyrpad ruh ia ki Block Development Officer jong ki Block bapher bapher ka District ba ki dei ban bthah ïa ki nongpynïaid shnong ba kin pyntip ïa ka jingdon ka Job Card kaba kyrpang na bynta ki briew kiba don jingduna ha ki dkhot met ban ioh trei ia ka skhim 100 sngi ne MGNREGS. Dei ban pynshlur ruh ban pynrung kyrteng.
Ha kajuh ka por, u Bah Thongi ula kyntu ia baroh ki briew kiba duna dkhot met ba kin wan khnang khnang sha ka jingialang ka ban long haka 24 tarik u Jylliew ha kaba u President rangbah ka KDA Bah Starwin Kharjana ruh un donlang, khnang ba ka seng kan ïoh ïa ki jingmut ha kaba ïadei bad ki jingeh kaba ki don bad shem.
