Shillong, Lber 11: Ka seng Hynniewtrep Youth Council (HYC) hynne ka sngi Nyngkong, kala maham jur ia ka Northeast Sunshine Truect (India) bad kiwei kiwei ki Agent Sorkar ba kim bit da lei lei ruh ban khyllie biang ia ka kitab tih Uranium hapoh ka Jylla.
“ Ka HYC: CEC lyngba kane ka kyrwoh ka kwah ban phah ka khubor kaba shai sha baroh kito ki Agent jong ka Sorkar India ne ka Sorkar Jylla ba kidei ban sangeh shi syndon ia kino kino ki jingthmu ban pyrkhat ne mutdur ba kin khlong lane tih ia u Uranium na ka Bri U Hynniewtrep” ong u President ka HYC Bah Roykupar Synrem.
Une u Nongialam ka HYC ula ong ba ka HYC ka ieng ha ka nongrim kaba skhem bad ka jutang bala khlei ba kan ym shah ban khlong ia une u marpoh khyndew na kane ka Ri.
“Kumba ngi lahdep ban kren naduh ki sngi bad ki snem kiba lahdep, haduh mynta ka kynti ruh ngi iaineh skhem ba ngi pyrshah jur ia kano kano ka jingpyrshang ban khyllie biang ia ka kitab tih Uranium napoh kane ka Ri ka jong ngi” ula ong.
“Ngi kren ruh da kaba shai ba kum ka Seng bad ki dkhot ki jong ka baroh, ngi long kiba lah kloi ban iakhun da kaba kano kano ruh ka lynti ban pynthikna baka Sorkar India ne ka Sorkar Jylla kan nym dei ban iohlad ban pyrshang pynim biang ia kane ka mat namar kan bha ba ngin iakhun mynta ban ia kaba ieh ban iap bad duhjaid ka Jaidbynriew lyngba kane ka bih jong u Uranium” ula bynrap.
Ha kajuh ka por, ka HYC ka pynrem jur bad maham tyngeh ruh ia ka Founder Trustee bad Chairperson ka NEST (India) kong Elizabeth Nongbri bad kiwei kiwei ba kim dei dei ban pyrshang mushlia laplah ia kane ka kam iap kam im jong ka Jaidbynriew.
“Lehse kane ka briew ka kwah ban sngewthuh (testing the waters) ia ka sur jong ki khun samla bad ki dkhot ka Jaidbynriew bad hadien pat ka pyrshang ban len noh ia kaei kaba ka lahdep ban thoh. To tip tang kawei ba kum ki Sengbhalang ne ki kynhun bapher bapher, ngi lah ban don ia shibun ki jingiapher ha ki lama ba ngi don, hynrei ngi long kawei ka jingmut bad ka jingthmu bad “kata ka long ban iada bad pynneh pynsah bad khamtam eh ban ialeh khlem kyn ryndandien na bynta la ka Jaidbynriew” ula ong.
 hynne ka sngi Nyngkong, kala maham jur ia ka Northeast Sunshine Truect (India) bad kiwei kiwei ki Agent Sorkar ba kim bit da lei lei ruh ban khyllie biang ia ka kitab tih Uranium hapoh ka Jylla.){kind=link}