‘Wat artatien’ ong u DyCM ia ki Nongialam ka HNLC ban wan sha ka miej iakren iasuk

Kloi ka Sorkar ban iakren shabar ka Jylla Meghalaya

Shillong, Naiwieng 22: U Symbud Myntri Rangbah ka Jylla ba khmih ia ka Tna kam pohiing Bah Prestone Tynsong ha ka sngi Balang ula kyntu ia ki Nongialam ba hakhlieh ka Hynniewtrep National Liberation Council (HNLC) ba kim dei ban artatien ia ka Sorkar Pdeng bad Sorkar Jylla namar ki long kiba la khreh ban ai ia ka lynti iaid kaba shngain ba kin wan sah ka miej iakren iasuk.

Kat kum ka jingong jong u, ka Sorkar ka long kaba la khreh ban pynlong ia ka jingiakren iasuk wat shabar ka Jylla Meghalaya.

“Nga kyrpad biang ia ki Nongialam ba hakhlieh ka HNLC ba kim dei ban don kano kano ka jingsngew bad don ka jingsngew artatien namar ngi la shimkhia na ka Sorkar la ka dei ka Sorkar Jylla ne Sorkar Pdeng” ong u Bah Prestone.

“Lada phi sngew ba kam long shngain ban iakren hapoh Meghalaya, ngi long ba khreh ban iakren shano shano ruh. Ka Sorkar Pdeng bad ka Sorkar Jylla ki long kiba kloi ban iakren shano shano ruh. Lada phi kwah ban iakren sha Kolkata lane ha kano kano ka Jylla, ngi long kiba la kreh ia kata” ula ong haba bynrap “Namar kata, ka jingkyrpad jong nga ia ki Nongialam ba hakhlieh ka HNLC ka long shai bha ba ka jingkhang ka dang iai plie bad ngi kyrpad ia ki ba kin sngewbha ban wan biang sha ka jingiakren bad ngi long kiba kloi ban shong iakren hapoh ka miej”.

Kane ka jingkren u Symbud Myntri Rangbah kala mih hadien san sngi ba u Chairman cum Commander in-Chief ka HNLC Bah Bobby Marwein bad u General Secretary cum- Publicity Secretary Bah Sainkupar Nongtraw kila pynpaw ia ka jing bym lah ban wan iashimbynta ha ka jingiakren iasuk tad haduh ba ka Sorkar kala kloi ban weng noh ia baroh ki case bala pynngat pyrshah ia ki bad ban iasoi ia ka soskular sangeh iasiat.

“Nga la iohi ia ka jingkren jong ki Nongialam ka HNLC…ka jingkyrpad jong nga sa shisien ia ka HNLC ka long kumne, sngewbha wan biang sha ka jingiakren namar tad haduh ba ngi la iakren markhmat ban tip ia kaei kaba phi kwah ngin ym lah ban poi shano shano ruh. Ngi la pyni ia ka jingshimkhia, ym duna ia ka lai-saw bnai, ngi la kitkhia ia ka bha ka miat ki dkhot ka seng, ngi la kitkhia ia ka jingshngain jong ki bad kam shym la don satia ka jingpyrshang ban kem ia ki, balei ba phi dang don ia ka jingsngew tieng” ula ong.

Halor ka rai ka HNLC ban pynkham ha u Vice Chairman ba dang shut hung thymmai Teimiki Laloo ban khmih ia ka jingiakren iasuk, u Bah Prestone ula ong “Hynrei u Chairman ne Commander-in-Chief ne mano mano, nga tharai ka dei ka jingmut jong u Nongialam ba hakhlieh duh”.