Nongpoh, Jymmang 20 : Ka jingther u slap kaba la neh palat 12 kynta ha Them Ri-Bhoi, kala wanrah ia ka jingshlei um kaba jur ha ka shnong Umpher, Byrnihat, kaba la ktah ia ki skul, ki iing ki sem bad ki lynti ki syngkien.
Kane ka jingther u slap kala sdang naduh hynnin ka miet sngi Nyngkong bad neh haduh hynne ka step sngi Ba-ar.
Ha kane ka jingshlei um, ka skul St.Jude Higher Secondary School, Byrnihat, ki Iingki sem kila dap da ka um kaba la rung wat sha ki kamra klas bad ki iing. Ki lynti ki syngkien ruh kila shah tap ha ka um, kaba la buh ha ka jingeh ia ki nongleit nongwan.
Kane ka jingshlei um ha ka thain ka dei kaba ju jia man ka aiom lyiur haba ther u slap bad ka daw hi ka dei namar ka jingbym biang ki nala um jong ka surok National Highway-06 ka National Highway Authority of India (NHAI).
Ka skul St.Jude Higher Secondary School kala hap ban ai shuti noh ia ki khynnah skul namar ka um kala rung shaduh ki kamra shong klas bad ki phyllaw jong ka skul.
Kum ban pynkynmaw, u MLA ka Jirang Constituency u Bah Sosthenes Sohtun ha u snem ba la dep u la ai ruh ki lad jingiarap sha katei ka skul bad ban iarap ruh ban pynkhuid ia ka nala um, hynrei mynta u snem kane ka jingjia ka jia biang kumjuh ha kaba ka la buh jingeh ia ki bor pyniaid skul bad ruh ia ka shnong ba ka jingshlei um ka jia beit ha kane ka shnong.
