Shillong, Jylliew 24: Ka Khasi Hills Autonomous District Council (KHADC) ha ka sngi Ba-ar, ka la wanrah ia ka mang tyngka kaba tam T.5,24,640 na ka bynta u snem mang tyngka 2025-2026 hapdeng ka jingpyrshah jong ki dkhot ka Liang Iatei.
“Ka jingpynlut ba la tyrwa la antad ba kan long T.227,48,35,620, ka kham duna ban ïa ka jingïoh khajna jong ka council kaba long T.227,53,60,260” ong u Executive Member ba khmih iaka tnat Finance u Bah Seiborlang Warbah haba wanrah ïa ka mang tyngka hapoh ka dorbar lyiur jong ka KHADC.
Ia ka mang tyngka la wanrah hadien ba u Chairman ka KHADC u la rai ban don daka jingthep vote daka ba phah ïeng iaki dkhot kiba kyrshan iaka mang tyngka hadien ka jingpyrshah na ki dkhot ka Liang Iatei ia ka rai jong ka Executive Committee (EC) ban pynrung ia ka jingdawa (Supplementary Expenditure) ha ka mang tyngka ba pura ha kaba ki dkhot ka Liang Iatei kila kynnoh ba kane ka long pyrshah ia ka riti synshar ka Ri bad kaba long long beain.
Ha ka jingkren mang tyngka, u Bah Seibor Warbah u la pynthikna ia ka Iingdorbar ba ka Executive Committee (EC) kan pyrshang katba lah ban wad ia ki lad ki lynti ban pynbha ia ka jingioh lum khajna jong ka Council bad ban buddien ia ki jingpynlut ki bym i donkam.
U Seibor u la pynbna ruh ia ka rai jong ka EC ban pynduh noh ia ka jingai wai ia ki khyrdop khlaw (Forest Gate). “Ngi la rai ban lum khajna hi noh na ki khyrdop” u la ong.
Ban pynduna shuh shuh ia ka jinglait kai ka khajna, u EM u la ïathuh ba ka EC ka la rai ba iaki Trading Lincense yn shon (Print) hi daka tnat Trade bad kane kan iarap ban kyntiew iaka khajna ym duna ia ka T.60 lak.
U EM u la ong ruh ba Council shen kan pyntreikam noh iaka buit siew Online iaka Professional Tax ha ki tnat treikam bapher bapher.
U la pyntip ba ka EC ka la rai ban bishar biang ia ka ain Buidling Bye Laws na ka bynta ka bha ka miat jong ki paidbah.
“Ngi la thaw ruh ia ka Recruitment Committee ban pynbeit ia ka rukom thung kam hapoh ka Council” u la bynrap.
U EM u la pyntip ba ka Sorkar Jylla lyngba ka 15th Finance Commission ka la pyllait ia ka pisa jong ka Tied Grant 1st Instalment na ka bynta u snem 2020-2021 bad 2021-2022.
Katkum ki kyndon ban pyntreikam ia ki skhim ba la mynjur hapoh ka 15th Finance Commission, baroh ki jingtyrwa hap ban thep ha ka E-gram Swaraj Portal hashwa ban pyllait ia ka pisa sha baroh ki ADC. Hynrei namar ki jingeh Technical ka la don ka jingpynslem ban pyndep ia ki kyndon ba la kdew.
U la pyntip ruh ba ha u bnai Nohprah 2024, ka Council ka la ioh T.12.15 klur kum ka First Instalment hapoh ka Untied Grant na ka bynta u snem 2021-2022, hadien ba la thep (Upload) ia ki skhim ha ka portal.
“Ka bynta kaba ar na ka bynta u snem 2021-2022 (na ka bynta baroh ar tylli ki Tied bad Untied) la dep ban pynrung” u la ong haba bynrap “Ka jingpynrung ïa ki skhim bad ki jingtyrwa na ka bynta u snem 2022-2023 ka la sdang. Ngi dang don ha ka jingpynrung ïa ki kot pynshisha jong ka jingpyndonkam ïa ki Grant ba la dep pyntreikam bad ngi khmih lynti ba ka Sorkar Pdeng kan pyllait iaka pisa haka por kaba biang”.
 ha ka sngi Ba-ar, ka la wanrah ia ka mang tyngka kaba tam T.5,24,640 na ka bynta u snem mang tyngka 2025-2026 hapdeng ka jingpyrshah jong ki dkhot ka Liang Iatei.){kind=link}