Nongpoh, Jymmang 04: Ka kynhun jong ka Meghalaya Arm wrestling Association kaba la mihkhmat naka ri India sha ka rynsam Asian Arm wrestling Championship kaba dang shu dep long ha Dubai, sa shisien ka la ïoh ban kyntiew ïaka nam ka burom jong ka jylla bad kumjuh ïaka ri baroh kawei Lyngba ki takma kiba la ïoh ban khur da ki rang bad ki thei ïakhun kti ka jylla.
Kitei ki takma la ïoh ban khur daka samla Airikmenlang shabong kaba la ïakhun haka kyrdan 50 kg kala ïoh ban khur ïa u takma rnong, ka kong Margaret Pathaw kaba la ïakhun haka kyrdan 70 kg ka la khur ïa u takma Ksiar haka jingïakhun kti ka mon bad ka diang, u Alexander Lyngdoh uba ïakhun haka 80 kg haka kyrdan hearing impaired u la ïoh ban khur ïa u takma Rnong haka jingïakhun kti kamon bad kadiang bad U Hubert Paliar uba la ïakhun haka thup 70 kg haka kyrdan hearing impaired u la khur ïa u takma ksiar haka jingïakhun kti ka mon bad takma Rupa haka jingïakhun kti kadiang.
Haka jingwan phai ïing kine ki rang bad ki thei ïakhun kti, naka liang ka HNYF Northern Region, FKJGP Nongpoh Circle bad ka Seng Samla Nongpoh ki la pdiang burom ïakine ki 4 ngut ki nongïalehkai ha Nongpoh hakaba la ïoh ruh ïa ki jingkren aimynsiem na ka liang kitei ki kynhun.
Naka liang ka Umsning Town Dorbar ryngkat bad ka KSU Umsning Circle, Ka CoRP bad ka Seng Longkmie Umsning ki la ïoh ban pyndonburom ïankitei ki rang bad ki thei ïakhunkti ka jylla kiba la mih khmat ïaka ri India bad ki la wanrah ruh ïaka nam ka burom lyngba ka jingïoh ban khur ïaki takma haki kyrdan bapher bapher.
