Kohima, Lber 02 :Ka kynhun synrop BJP-NDPP ki la jam palat ia ka jingbun paid da kaba jop 37 seat bad wanphai biang ha ka bor synshar.
Ha kawei pat ka liang u Myntri Rangbah (CM) Neiphiu Rio ula pynrem noh ia u kyrtong ka seng Congress u Seyievilie Sachu na Northern Angami-II constituency.
Ka Bharatiya Janata Party ka la jop 12 seats katba ka Nationalist Democratic Progressive Party ka la jop haduh 25 seat.
Ha kawei pat ka liang ki la don saw ngut ki kyrtong shimet kiba la ioh ia ka jingjop ha kane ka ilekshon. Ka Janata Dal (United) ka la ioh shi seat, ka Lok Janshakti Party(Ram Vilas) 2 seat bad ka Naga Peoples Front ka la jop 2 seat.Ka National People’s Party u jop 5 seat bad ka Nationalist Congress Party hynriew seat.Shuh shuh ka Republican Party of India (Athawale) ruh ka la ioh ia ka jingjop na ki artylli ki seat.
BJP{18.83%}, INC{3.54%}, JD(U){3.25%}, LJPRV{8.65%}, NCP{9.55%}, NDPP{32.23%}, NPEP{5.77%}, NPF{7.10%}, RJD{0.50%} bad u NOTA{0.31%}.
Ha ka sien kaba nyngkong hadien 60 tylli ki snem, arngut ki kyrtong kiba dei ki kynthei na Nagaland kiba iakhun ha kane ka ilekshon assembly ha ka jylla ki la shah jied kum ki dkhot ka ka iingdorbar Assembly (MLA).
Ka Salhoutuonuo Kruse bad ka Hekani Jakhalu baroh arngut kiba dei ki dkhot jong ka Nationalist Democratic Progressive Party (NDPP), ki la thaw histori ban kylla long ki kynthei kiba nyngkong ki ban ia aireng ha ka ilekshon assembly ha ka jylla.
Ka Kruse ka la jop napoh Western Angami Assembly constituency katba ka Jakhalu ka la jop na Dimapur lll constituency.
