Shillong, Naitung 20: Da ka jingpynjari ia korphiw bad ka jingsniew ka jinglong jingman hapoh ka ri Bangladesh, hynne ka sngi Saitjain, ki samla pule na ka ri India kiba don ha Bangladesh kila wanphai noh mardor lyngba ki kali bad ki liengsuiñ bad ha ka Land Port ha Dawki kila don 957 ngut ki samla kiba la wanphai ha kine ki 3 sngi.
Katto katne ngut ki samla pule kila iaid lyngba na Dhaka sha Tripura ha ka sngi Saitjain, kiba bun kila rung lyngba ka Land Port Dawki. U heh jong ka Land Port Dawki ula pyntip ba haduh mynta ki don 284 ngut ki samla pule kiba la wan lyngba ka Land Port kaba kynthup ia 115 ngut ki nong India kaba kynthup lang ia 8 ngut na Meghalaya, 168 ngut na Nepal bad uwei na ri Canada.
“Ngi khmih lynti, ha ka por mynmiet yn bun shuh shuh bad lashai ka sngi”, la ong uwei u heh ka Land Port Dawki. Baroh ki samla pule kila ioh ia ka jingiarap kat kaba lah ha ka Land Port na ka bynta ban leit phai sha la iing.
Kila don 673 ngut ki samla pule kila wanphai sha India lyngba ka Dawki International Land Port ha ka 18-19 tarik Jylliew.
Nalor ka Land Port, ki samla pule kila wanphai ruh sha India lyngba ka liengsuiñ. Kiba bun na kine ki samla pule ki dei kiba shong iaka liengsuiñ na Dhaka sha Kolkata bad ka tnad Civil Aviation jong baroh ar tylli ki Ri kila iatreilang ban pynlong ia kane kaba seisoh.
Ha ka jingshisha, bun tylli ki tnad na ka ri India bad Bangladesh kila ïasnoh kti lang bad ki ïatreilang baroh shisngi na ka bynta ban leitphai sha la ka ri. Kiba ialam ia kane ka jingpyrshang, kidei ki High Commission jong ka India bad ka Bangladesh ryngkat ka jingialam bad jingkyrshan na ki tnad ba dei peit ia ki kam shabar ri jong baroh ar tylli ki ri.
Ka High Commission ka India ha Dhaka kala pyntip ba ka Ministry of External Affairs ne ka tnad kam bar ri ka dang ïatreilang ruh bad ka Civil Aviation, Immigration, Land Port bad ki shipai BSF ban pynthikna ïa ka jingïaid lynti kaba shngaiñ na ka bynta ki nongshong shnong jong ngi.”
Ka High Commission kala pyntip ba ki don kumba 5000 ngut ki samla pule na India ha Bangladesh. “Ki samla pule na India kila wanphai sha India lyngba ki land port bad liengsuiñ bapher lyngba ki kad liengsuiñ ha Dhaka bad Chittagong. Ngi dang ïakren bad palat 4000 ngut ki samla pule kiba dang sah ha ki skulbah bapher bapher ha Bangladesh bad ngin ai ïa ki jingïarap kiba donkam,” ong ka High Commission.
Haduh ka sngi Thohdieng kila don kumba 1000 ngut ki samla pule kiba la wanphai sha India lyngba ka Agartala, Dawki bad Kolkata, ha kaba kiba bun ki samla pule ki wan lyngba ka Dawki Land Port bad nangta ki leit sha la ki ïing ki sem ha kiwei pat ki bynta jong ka ri.
