Shillong, Nailar 22: U Myntri Khynnah ka Sorkar Pdeng ba khmih iaka tnat pohiing Bandi Sanjay Kumar ha ka sngi Thohdieng, ula wan poi ha nongbah Shillong bad bishar bniah ia ki skhim pynroi ba la bei tyngka da ka Sorkar Pdeng, ki ba la pyntreikam da ka Sorkar Jylla.
Ha kane ka jingwan poi ha Shillong, u Myntri Khynnah u la ïakren bad ki tnat bapher bapher bad ula pan jingmut na ki bad ban ithuh ïa ki mat kiba dang sahteng kiba donkam ban shimkhia daka Sorkar India.
“U (MoS) u la pynthikna ba u long uba kloi ban shim ia kino kino ki mat kiba dang sahteng bad ka Sorkar India” ong u Additional Chief Secretary u Shakhil P Ahammed haba kren ha ki nongthoh khubor hadien ba la wai ka jingialang.
Haba kylli hato la ïakren ïa ka jinglong jingman ha khappud India-Bangladesh ha kane ka jingïalang, u ACS u la ong ba u Myntri Khynnah u la kren kyrpang tang ïa ki mat kiba ïadei bad ka tnat kam pohïing da kaba pynleit jingmut ha kaba pynbeit ïa ki kam kiba dang sahteng.
U Bandi Sanjay Kumar u la bishar bniah ia baroh ki skhim ba la kyrshan bad bei tyngka da ka Sorkar Pdeng, da kaba ai jingmut ban pynbha bad pyntreikam iaki baroh naka bynta ka jingmyntoi ki paidbah.
