Shillong, Nohprah 17 : Ka Sorkar Pdeng bad ka Sorkar Jylla, kila peitngor bha ia ka jinglong jingman ha khappud hadien ka jingiohi ia ka jingwan her ka drone ki shipai Bangladesh- ka Bangladeshi Bayraktar TB2 Unmanned Aerial Vehicle (UAV) ha khappud ka thain Sohra bad Shella, East Khasi Hills District.
Ia kane la pyntip da u Symbud Myntri Rangbah ka Jylla ba khmih ia ka kam pohiing (Police) Bah Prestone Tynsong uba la iathuh ba ia kane ka drone la iohi marjan ka Sohra bad Shella, kumba 200 meter shathie jong u zero line.
Ka Meghalaya la don ia u khappud ba 443 km bad ka Ri Bangladesh.
Haba iakren bad ki nongthoh khubor, u Bah Prestone ula ong “Ngi (Sorkar jylla) la peitngor bad pyntip beit ia kaei kaba jia sha ka Sorkar India halor kane ka kam bad ka Sorkar India ruh kala shimkhia bha ia kane. Kumjuh, kum ka Sorkar Jylla, ngi la leh iala ka jong ka kamram”.
“Kumba nga ong, ka Sorkar Jylla bad ka Sorkar Pdeng kila peitngor bha ia kane ka kam. Sngewbha wat ym khuslai. Kiei kiei baroh kin biang lut” ula kular haba bynrap ‘Ka dei ka kamram jong ka Sorkar Pdeng ba kan iakren ia kane ka kam bad ka Sorkar Bangladesh”.
Haba kylli, u Bah Prestone ula pyntip b aula bthah ia u Chief Secretary bad ia ka Director General of Police (DGP) ka Jylla ba kin shim ia ki sienjam ba donkam halor kane ka kam.
Haba kyntait ban iathuh kham bniah ia kane ka kam, ula ong “Ki don ki ishu, kiba ngam kwah ban batai. Kumta, sngewbha sngewthuh lem ba kane ka ishu ka dei ka kam kaba hap husiar bha kumta ngam lah ban iathuh lut ia phi. Kaei kaba nga ong ka long ba ka kamram jong ka Sorkar Jylla ka long ban pynthikna ba kum kine ki kam kin dei ban jia biang”.
Nalor kane, u Symbud Myntri Rangbah ula ong ba ka Sorkar kala lum ia ka jingialang bishar kam halor kane ka kam man ka kynta.
 ha khappud ka thain Sohra bad Shella, East Khasi Hills District.){kind=link}