Shillong, Jymmang 28 : Ki lai ngut ki briew kiba la mih kyrteng kum ki Nongialam ba hakhlieh duh jong ka kynhun thymmai ka Garo National Liberation Army (GNLA), kila wan ban pyndem ialade hakhmat ki Pulit ka West Garo Hills.
Kat kum ka jingpyntip u Superintendent of Police ka West Garo Hills, ki Pulit kila pynlong ia ka jingtohkit ba mardor halor ka jingmih khubor bad ki dur shaphang ka jingpyn-im pat ia ka GNLA ha Ri-lum Garo, kaba la ai kyrteng ruh ia ki Nongialam kata ia u Jingjang D Shira kum u Chief Executive Director ka GNLA, bad u Nengsrang Sangma kum u Secretary thymmai ka GNLA.
U pyntip ba ha ka jingtohkit, Ki Pulit la lap ba ki dur ba mih ha ki khubor ki dei jong u Namchang Ch Momin ba khot sin u Jingjang D Shira ba dang 22 snem na Darangagre, Dalu, u Adot M Sangma ba 26 snem na Ganipara, Dalu bad u Silwit R Marak ba 26 snem na Nalnapara, Dalu.
U SP u pyntip ba ki Pulit khlem da pynslem, kila pynlong ia ka jingkhynra kaikhlaw bad ka kynhun kala hiar sha Shnong Darangagre hynrei ha lynti, kila ioh khubor noh na Kherapara Outpost ba baroh kine ki laingut ki briew kila wan pyndem ialade hapoh ka Outpost.
Ka kynhun kala leit phai sha Kherapara OP bad kala pynlong ia ka jingtohkit kaba bniah ia kine ki lai ngut bad kila kem noh ruh ia ki. Hadien kane, ki Pulit kila hiar khynra ia ka Iingsah u Manchang Ch Momin ba khot sin u Jingjang, bad uih kurip ia bun bah ki tiar ba donkam kynthup ki jain commando, ki boot bad kiwei kiwei.
U Superintendent of Police u pyntip ba la pynthikna ba kam pat don satia ka jingpynim pat ia ka GNLA bad kine ki lai ngut ki briew kila leh ia kane ka kam tang ban pyntieng pynsmiej ia u paidbah bad ban dawa pisa na ki Nongkhaii bad kiwei kiwei.
U iathuh ba la suba ruh ba kin dang don katto katne ngut ki briew kiba iadonkti lang ha kane ka kam bad ka jingtohkit mynta kala iaid shakhmat ban kyndang naduh tynrai ia kane ka jingiasuh buit.
