Shillong, Jymmang 28 : Ki Nongialam ka Khasi Students’ Union (KSU) hynne ka sngi U Blei, kila leit iakynduh ia u President ka VPP bad MLA ka Nongkrem Bah Ardent M Basaiawmoit, uba shong shah jingit mynta sha ka sngi kaba 6 ha jaka pynieng kali ba marjan ka Additional Secretariat.
U President ka KSU samla Lambokstar Marngar ha kane ka jingleit iakynduh, ula kyntu ia ka Sorkar Jylla ban khot noh ia u President ka VPP ban iakren halor ki jingdawa jong kane ka party ban bishar thymmai ia ka Reservation Policy, lem kumta ka lah ban nang aiding iaka jinglong jingman ba kham sniew.
Ka KSU kala kyrshan ruh ia ka jingdawa ka VPP ban bishar thymmai ia ka Policy, kaba dei ruh kawei na ki jingdawa jong ka KSU ha ki snem bala leit noh.
Hadien ka jingwan jngoh ka KSU, haba iakren bad ki nongthoh khubor, u Nongialam ka VPP Ricky Syngkon ula pyntip ba ka VPP kan nym iadon bynta satia ha ka Committee bala thaw da ka Sorkar Jylla ban iakren bad iatai ia ki kam ba iadei bad ka Reservation Roster namar ka nongrim jong ka VPP ka long kaba shai naduh kaba sdang bad kata ka long b aka Sorkar ka donkam ban bishar thymmai noh ia ka Reservation Policy ym ia ka Roster System.
U Bah Syngkon ula ong ba kam don jingmut ban iadonlang ha ka Committee kaba iakren bad iatai halor ka Roster.
Kumban shu kdew, hadien ka jingialang jong baroh ki Seng Sain pyrthei, ka Sorkar Jylla kala thaw iaka Committee kaba khlieh da ka Myntri Sorkar Kong Ampareen Lyngdoh bad kynthup iaki dkhot na baroh ki seng sain pyrthei.
Ki Dkhot ki kynthup ia BJP- Bah HM Shangpliang, Zenith Sangma na ka AITC, Pyndapborthiaw Saibon na ka KHNAM, Ronnie V Lyngdoh n aka INC, Augustine Marak naka GNC, Methodius Dkhar na ka HSPDP, Dr WR Kharlukhi na ka NPP, bad Renikton Lyngdoh Tongkhar n aka UDP.
