Guwahati, Nohprah 18: U Director jong ka Central Bureau of Investigation (CBI) u Praveen Sood hynne ka sngi Nyngkong ula wan poi ha nongbah Guwahati ha kaba iadei bad ka jingaiti iaka chargesheet da CBI halor ka jingjia jong ki kam iaumsnam ha Manipur.
Katkum ki tyllong khubor, kila iathuh ba une u khlieh jong ka CBI yn khmih bniah ia ka jingtreikam jongka SIT kiba dei da ki heh ophisar kiba hapoh jong ka kyrdan DIG kiba tohkit halor ka jingjia hapoh jylla Manipur kumba la pan da ka sorkar jylla.
“Ka CBI ka dang khmih bniah bad tohkit halor ki 6 tylli ki jingjia hapoh Manipur, katba ki 5 tylli kiwei pat kidei halor ki kam iasylla bad jingiasuh buit halor ki kam iaumsnam” la ithuh ki tyllong khubor.
U Director ka CBI yn shong da ka liengsiuin ban leit sha Imphal.
Kham hashwa, ha ka 27 tarik u Nailur, ka kynhun kyrpang jong ka CBI kaba la lamkhmat da u Praveen Sood kala poi ha Manipur ban pynsted ia ki kam tohkit halor ka jingkynnoh ba ki ar ngut ki samla pule kila shah pyniap. Kane ka kynhun kala tohkit halor ka jingshah pyniap u Hijam Luwangbi Linthoinganbi bad Philem Hemanjit.
Ha ka 9 tarik u Nohprah, ka Central Bureau of Investigation (CBI) kala aiti ia ka chargesheet pyrshha ia ki 9 ngut kiba la donkti ha kaba iadei bad ka jingrahbor bad jingpyniap ia kawei ka longkmie Naga kaba la 55 snem ka rta hapoh jylla Manipur ha u Naitung hapdeng jong ka jingiaumsnam.
