Shillong Nailur 23: Ar ngut ki nongmareh naka ri Kenya kila wan poi hynne ka sngi ha Jylla, ban pynkhreh na ka bynta ka jingiakob mareh kaba la tip kum ka 2nd Sohra International Half Marathon Run kaban long ha ka 30 tarik mynta u bnai.
Kine ki arngut ki nong Kenya ki kynthup ia u Elijah Kipruto Kemei 35 snem ka rta bad ka Agnes Mueni Mutua 36 snem ka rta.
U Elijah ula shim por tang 1 kynta 5 minit ban pyndep iaka jingmareh ha ka Half Marathon bad ula iashimbynta ha kiba bun tylli ki Marathon kum ka Mumbai 2018, China 2019, Sohra International Half Marathon 2022, Udaipur 2023 bad Gujarat 2023.
Katba ka Agnes kala shim por 1 kynta 14 minit ha kaba jingmareh kaba 21 Km.
Kala iashimbynta ha ka Tanzania 2022, Rwanda 2023 bad kadei ka sien kaba nyngkong eh ia ka ban iashimbynta haka jingiakob mareh marathon hapoh ka ri India.
Kine baroh ar ngut ki nongmareh, hynin ka sngi kila leit sha ka ophis jong ka Meghalaya State Olympic Association ban iakynduh ia u Bah Finely L Pariat uba long u Organising Secretary bad u Bah John F Kharshiing Co-Chairman ka 2nd Sohra International Half Marathon 2023.
Kial pynpaw iaka jingkmen ban wan poi ha ka jylla Meghalaya, India bad kila pyntip ba ka jingwan kloi ka jongki, ka long ba kin ioh ban praktis ban pynkhreh ialade khamtam ha kaba iadei bad ka jinglong jingman jong ki riat ki ram bad ka suiñbneng.
