Shillong, Jymmang 16 : Ki Nongialam jong ka kynhun kiengatiar bala shah khein be-ain Hynniewtrep National Liberation Council (HNLC) kila wan poi biang sha Shillong ban pynbteng ia ka jingiakren iasuk bad ka Sorkar Jylla lem bad ka Sorkar Pdeng.
Kine ki Nongialam ka HNLC kila iashondur lang ruh bad u ksiang ka Kynhun ban mihkhmat sha ka jingiakren iasuk Bah Sadon Blah ha Nehru Park, Umiam, hynne ka sngi Ba-ar.
Hynrei, kam shym la don satia kano kano ka jingpyllait khubor la ka dei na u Bah Sadon Blah ne na ki bor Sorkar halor kane ka jingwan poi biang ki Nongialam ka HNLC.
Lah ban kdew hangne ba san ngut ki Nongialam jong ka HNLC kila wan poi nyngkong eh sha Shillong ha ka 5 tarik Nailar 2022 bad kila leit phai sha Bangladesh ha ka 16 tarik Nailur 2022 hadien ka jingiakren iasuk kaba la iaid katto katne sien.
Kine ki san ngut ki Nongialam ka HNLC ki kynthup ia u Vice Chairman Manbhalang Jyrwa, Publicity Secretary Aristerwell Thongni, Foreign Secretary Phrangkupar Diengdoh bad arngut ki PSO Aiborlem Marbaniang bad u Storgy Lyngdoh.
Kine ki Nongialam ka HNLC kila wan sha Shillong hadien ka jingioh ia ka lynti iaid kaba shngain naka Sorkar Jylla.
Kat kum ka khubor ba ioh lum, kine ki saw ngut ki Nongialam ka HNLC kila leit iakynduh ruh ia u Myntri kam Pohiing (Police) Bah Prestone Tynsong.
