Nongpoh, Risaw 28: Ha kawei ka jingjia kaba la pynher mynsiem ia ki nongshong shnong jong kawei ka shnong ha Ri Bhoi District kiba dang ioh thiah lyngngai na ka jingmih ki jingsawa her bad ki jingkyrkait ki sim han khyllah.
Kane ka jingjia wan her ki sim han da ki spah tylli ka la jia ha ka shiteng miet ha ka por 12 baje eiei ha ka 25 tarik u Risaw ha ka shnong Klew kaba hap hapoh ka Raid Madan Kyrdem, Ri Bhoi District.
Katkum ka jingiathuh da u Rangbah Shnong ka Klew, u Bah Lamburom Masharing, u la iathuh, ba watla kane ka jingjia ka la jia ha ka 25 tarik Risaw ha kaba da ki spah tylli ki han khyllah ki la wan her ha ka sahit bneng ha ka shnong jong ki bad ban pynmih ia ki jingsawa kiba khyllah tad haduh ba ki nongshong shnong ki la shah pynthut ka thiah ka dem bad don napdeng ki nongshong kiba la mih ban sakhi ia kine ki han khyllah.
La iathuh ruh, ba dei ha ka sngi kaba bud, u wei u nongshong shnong u la ioh ban kem ia kawei ka han kaba dei na ka kynhun jong kito ki han khyllah kaba la sahkut ha ka pynthor kba bad u la pyntip sha u Rangbah Shnong, kumta da ka jingburom ia ki kyndon shnong ban nym pyniap ne pynmynsaw ia ki mrad ki mreng ne ki sim ki doh kumta la ri sumar ia kane ka han tad haduh ban da ioh ban aiti noh sha ki bor ka tnad Wildlife ka district.
Na ka liang ka Dorbar Shnong ka la kyrpad ruh ia kiwei kiwei ki Shnong ba marjan, ba kim dei ban pyniap ne pynmynsaw ia kine ki sim khyllah kiba la wan her sha kane ka thaiñ hynrei ban pyntip ne aiti sha ki bor ka tnad Wildlife.
