Shillong, Risaw 09: Ka met kaba sah jong u Samla Tiklu Jyrwa uba la khlad noh naka jingshah tap ha u lumthah Draupadi Ka Danda II, kala wan poi hynne ka miet sngi U Blei ha Shillong bad la buh ia kane ka met haka iingsah jong une u Samla kaba don ha Upper Lumparing, Shillong.
Ia ka met jongu Samla Tiklu la pynkit da ka liengsuin na Dehradun Airport bad la wan pynpoi ha Guwahati Airport bad nangne la rah pat da ka kali ban pynpoi sha nongbah Shillong ha kaba la synran ia ka met jong u da ki pulit, ki bahaiing bahsem bad ki ophisar ka sorkar jylla haduh ban da poi ha Upper Lumparing.
Kumban shu pynkynmaw u Tiklu u la leit ban iashimbynta haka Advance Mountaineering Course jongka Nehru Institute of Mountaineering (NIM) Uttarkashi, Uttarakhand hynrei ha ka 4 tarik u Risaw ha ka por ba ki dang leit kiew ia u lumthah Draupadi ka Danda II, u lum thah ula twa kynsan ban ula ioh ban ia ki 29 ngut ki nongkiew lum kynthup ia ki nongai jinghikai.
Ha katei ka jingjia, kila don baroh 41 ngut kiba la leit kiew ia u lumthah hynrei 29 ngut kila shah tap bad 12 ngut kila lait im na ka apot sepsngi.
Ka kynhun jong ka SDRF, NIM, Airforce, HAWS, Indian Army, ITBP bad kiwei pat kila leit wad bad kila ioh ban sei iaka met jong u samla Tiklu Jyrwa bad ia ki 26 ngut bad haduh mynta ki dang pyrshang ban wad sa iaka met jong ki 2 ngut kiba la shah tap ha u lumthah.
U Bah Wallambok Lyngdoh Marshillong uba long u General Secretary ka Meghalaya Sport Climbing and Mountaineering Association (MeSCMA) ula ong ba kadei ka jingpyniaid ba stad jong u Blei ba la ioh ban sei iaka met jongu samla Tiklu bad kiwei pat ki nongkiew lum, namar ha kiba bun hi ki jingjia, haba u lumthah u twa bad tap ia ki nongkiew lum ym ju lap shuh iaka met ka jong ki.
Ia ka met jong u Tiklu la ioh ban sei haka 8 tarik u Risaw.
“Ki Instructor kila iathuh ba u Tiklu udei uba tbit bad uba khlain tam na baroh ki nongkiew lum ha katei ka kynhun bad ka jingshah tap u Tiklu ha u lumthah kadei haka por ba u dang ialam nakhmat iaka kynhun jong ki nongkiew lumthah” ong u Wallambok.
U la pyntip ruh ba ia u Samla Tiklu yn pyndep iaka jinglehniam lehrukom haka 11 tarik mynta u bnai ha u Lum Jingtep jong ka Balang Presbyterian ha Lumparing.
