Shillong, Lber 16: Ka kynhun ïalehkai phutbol jong ka Ri Maldives ka la wan poi ha Nongbah Shillong hynne ka sngi U Blei na ka bynta ka jingïakhun phutbol International kaba nyngkong eh ha Jylla Meghalaya.
Iaka kynhun ïalehkai ka Ri Maldives la pdiang sngewbha da u Bah Cliff Nongrum Vice President ka Meghalaya Football Association (MFA) lem bad kiwei ki dkhot ka MFA ha Hotel Vivanta, Khyndailad kaba dei ruh ka jaka sah jong ki hashuwa ban iakhun pyrshah iaka India.
Ka jingïalehkai paralok kaban sa wan ka long kum ka jingïalehkai kaba kongsan bha na ka bynta ka India, namar ba ki dang pynkhreh na ka bynta ka jingïakhun pyrshah ïa ka Bangladesh haka thup AFC Asian Cup 2027 Qualifier ka ban long haka 25 tarik mynta u bnai.
Ha kane ka jingïalehkai phutbol International kaba nyngkong eh ha Meghalaya, la khmih lynti ba kan khring bha ia ki riew ieid phutbol bad ka ban pynsah jingkynmaw ha ka jingialehkai phutbol ha Meghalaya.
