“Bun ki dei ki Nongtrei Sorkar, Nongialam Niam bad Nonghikai”: Rangbah Shnong
Nongpoh, Jylliew 20 : Da ki phew ngut ki Manipuri kiba wan phetwir sha Pillangkata bad Maikhuli, Ri-Bhoi District, kiba don ha khappud ka Assam ban ioh jaka riehtngen ba shipor namar ka thma iapher Jaidbynriew kaba khlem sangeh ha Manipur mynta la jan 50 sngi.
Kiba bun na kine ki poi phetwir ha Ri-Bhoi ki dei ki Nongtrei Sorkar, ki Nongialam Niam bad ki Nonghikai Skul, pyntip ki borshnong ka thain.
U Rangbah Shnong ka Pillangkata Bah Besterfield Shylla ula iathuh ba hadien ka jingioh jingtip ia kane ka jingwan riehtngen ki briew na Manipur ha Shnong, ki bor Shnong kila leit iakynduh ia ki Nongialam jong ka Jaidbynriew HMAR bad Zomi Welfare Association ban iakren pynbeit ia kane ka jingwan riehtngen shipor jong kine ki briew bad ban pynthikna ruh ba kam dei ban don kano kano ka jingwan riehtngen khlem ka jingtip ki bor Shnong bad ruh ki Pulit.
Ula pyntip ba kane ka sienjam bala shim da ka borshnong ka long ruh ban pynthikna ba kane ka jingwan jong kine ki riew kan ym wanrah ia kino kino ki jingjia ki bym lah ban pdiang ha ka imlang sahlang ne kaban ktah ia ka shongsuk shongsain.
Haba kylli, u Bah Besterfield u pyntip ba ha ka jingwan jingtip kum u Nongialam Shnong, la lap ba kine ki briew ba wan riehtngen shipir ha Shnong ki dei kiba treikam Sorkar, ki Nongialam Niam bad ki Nonghikai.
“Kine ki briew kila pynthikna ba hadien ka jingwan phai ka jingshongsuk shongsain ha Jylla Manipur, kin sa leit phai noh shala iing la sem ha Manipur” ula pyntip.
Haba iakren bad uwei u riewniam ka Jylla Manipur uba la wan phet riehtngen ha Ri-Bhoi uba dei ruh u Deacon jong ka Evangelical Church of India S Chinpu, ula iathuh ba kum ki nongshongshnong ka Manipur, kim shym la poi pyrkhat b aka jingiakynad ha katei ka Jylla kan neh sah bad nang jur na kawei ka sngi sha kawei pat.
“Kane ka jingiakynad kala wanrah ia ka jingduhnong kaba khraw ia ki nongshongshnong ha kiba bun ki liang khamtam eh ka jingduh ei ia ki mynsiem kiba kordor” ula ong haba bynrap “Kum u Nongialam Niam, nga kyrpad ia ki bor ka Sorkar Manipur ba kin shimkhia mardor ha kaban wanrah noh ia ka jingshongsuk shongsain hapoh ka Jylla”.
U Nongialam ka Zomi Welfare Association SK Mung bad ki jaidbynriew HMAR, kila ai khublei ia ka Dorbar Shnong Pillangkata bad Maikhuli bad kumjuh ruh ia ki bor Pulit kiba la ailad ia kine ki jaidbynriew jong ki ba kin riehtngen shipor ha kine ki Shnong.
