Pynkhreh ka Ophis u Myntri Rangbah ia ka liengsuin ba kyrpang
Shillong, Jymmang 06 : Sa 17 ngut ki samla pule kiba pule ha ki jaka pule bapher bapher ha Manipur, kila wan poi hynne ka sngi saitjain ha Guwahati Airport bad sa 165 ngut kin sa nang wan phai ha kine ki saw sngi ban wan kata haduh ka 10 tarik u Jymmang.
Ia kane la pyntip da ka Ophis u Myntri Rangbah ka Jylla (Chief Minister’s Office) haba iathuh ba ia kine ki samla pule ki ban sa nang wan, yn wan ialam da ka liengsuin bala pynkhreh jaka (booked) da ka Ophis u Myntri Rangbah ka Jylla Conrad K Sangma bad da ka jingiatreilang bad ki shipai India Army, ia kine ki samla pule yn synran da ki shipai naduh ka jaka ba ki sah haduh ha Imphal Airport.
Ka CM Office ka pyntip ba hynne ka sngi, 17 ngut ki samla pule kila wan poi ha Guwahati Airport bad la pdiang ia ki da ki Ophisar ka Jylla kiba la pynbiang ruh ia ki jingbam hashuwa ba kin kiew ha ki bos bala pynkhreh da ka Jylla ban ialam ia ki sha Shillong bad sha Ri-lum Garo.
Ka pyntip ba ha kine ki saw sngi ban wan kata naduh ka 7 tarik haduh ka 10 tarik Jymmang, kin don sa 165 ngut ki samla pule bad nong Meghalaya kiban sa leit shaw na Imphal. Kine ki long 50 ngut ki samla pule/nong Meghalaya ki ban wanphai ha ka 7 tarik, 70 ngut ha ka 8 tarik, 30 ngut ha ka 9 tarik bad 15 ngut ha ka 10 tarik.
La pyntip ba ka Sorkar kala phah ia arngut ki Ophisar ka Jylla ban leit bad sah ha Imphal na ka bynta ban khmih ia ka jing wan ialam noh ia ki samla pule/nongshongshnong ka Jylla bad ban pynbeit ia ka jingkyrshan jong ki bor sorkar ka Manipur na ka bynta ka jingiaid lynti kaba shngain jong kine ki samla pule.
Lah ban kdew ba hynnin ka sngi Thohdieng, haduh 66 ngut ki samla pule bad nong Meghalaya kila wan phai shala iing na Manipur da ka jingiarap ka Sorkar Jylla. Kine kila wan da ka Alliance Air bala pynkhreh da ka Sorkar Jylla halor ka jingbthah jong u Myntri Rangbah ka Jylla.
Namar ka jinglong jingman ka bym pat thikna ha Jylla Manipur namar ka jingiakynad pher jaidbynriew hapdeng ki paid riewlum ka Jylla bad ki jaidbynriew Meitei, u Myntri Rangbah ka Jylla ula lum biang ia ka jingialang shong bishar kam hynne ka sngi ban ioh jingtip ia kaei kaba long ba man halor ka jingwan phai ki samla pule.
Ka Sorkar Jylla kala iakren khlem sangeh bad ki samla pule ha Manipur ban peit thuh ia ka jinglong jingman ha katei ka jaka bad ban ai jingiarap ia ki kat kaba don ba kin lah ban wanphai suk sha Jylla.
