Nongpoh, Nailar 26 :Ki khlur ialehkai iakhun kti ka Jylla, kila wan phai hynne ka sngi Nyngkong ryngkat ki takma na ka lympung ialehkai World Armwrestlin Champion 2024 bad ka World Para Armwrestling Champion ba dang shu dei shen ha Maldova, Europe.
Kina ki khlur ialehkai ki kynthup ia ka kong Starina Jasain, kaba khur ia u takma Rupa ha ka Left hand Grand Master Women jong ka 60 Kg bad ia u takma Rnong ha ka Right hand Grand Master Women kaba 60 Kg, Ka kong Margaret Pathaw ka la khur ia u takma rnong ha ka Left Hand Master Women ha ka 60 kg bad takma Rupa ha ka Right Hand Master Women jong ka 60 Kg.
Ka kong Mihsngewbha Rymbai ka la khur ia u takma rupa ha ka Left Hand Grand Master Women jong ka 80 Kg bad ha Right Hand Grand Master Women jong ka 80 Kg ka la ioh ban khur ia u takma rupa, ka samla Senebi Syngkli ka la khur ar tylli ki takma rnong kata ha ka Right bad Left category bad u Bah Hubert Paliar u la khur ia ka takma rnong ha ka Para Arm Wrestling ha ka kyrdan 60 kg.
Kine ki khlur kila ioh ia ka jingpdiang burom halor kane ka jingjop jong ki na ka seng ka HNYF-Northern Region, ha phyllaw ka Ophis u District Transport Officer. Kane ka Seng kala pdiang burom da ki syntiew bad ki jain ryndia.
Haba kren ha ka jingialang, u President ka HNYF Bah Hesting Lyngdoh u la pynpaw iaka jingkmen ban ioh pdiang burom iakine ki nongialehkai kiba la poi shaduh ka kyrdan jong ka Inter national Level bad kiba la lah ruh ban khur iaki takma ha katei ka lympung.
Ka kong Magret Pathaw ka thei iakhun kti jong ka jylla kaba shong ba sah ha Ri Bhoi District, ka la pynpaw iaka jingkmen ban iohi ba ki rang bad ki thei kiba la ia leit lang sha katei ka lympung, ki la lah ban ialehkai bha khamtam ha ka kyrdan Youth Category naba ka shem jingeh ban pynmih ia ki nongiashim bynta ban mihkhmat naka ri India ha kane ka kyrdan hynrei ngi sngew sarong pat ban ioh iaki samla napoh ka jylla Meghalaya ki ba la mihkhmat ha kane ka kyrdan.
Shuh shuh ka Kong Magret Pathaw, ka la pan map na ki paidbah ka jylla ba kam lah ban poi sha ka thong ban khur iaki takma ksiar kumba la don jingkyrmen na katei ka rynsan hynrei kum ka thei ia khun kti kaba la paw, ka ai mynsiem pat ia kine kiwei kiba la mihkhmat na ka jylla kiba la lah ruh ban khur ia ki takma ba kin nang iai treishitom ha kane ka rynsan iakhun kti bad ba kin nang lah ruh ban kiew shaphrang ha ka kam ialehkai.
U nongialam ka kynhun ka ri India, Bah Alan Sun Marbaniang kum u Nonghikai ia kitei ki rang bad ki thei ia khunkti jong ka jylla, u la ong ba wat hapdeng ki jingeh kiba bun ha kaba iadei bad katei ka jingleit jong ki ban ia shimbynta ha katei ka rynsan kaba heh, hynrei u dap pat da ka jingkmen ban iohi ba baroh 12 ngut kiba ia shim bynta ha katei ka rynsan ki la lah ban ialehkai bha bad ki la lah ruh ban wan shaduh ki kyrdan kiba kham shakhmat.
