Guwahati, Nailar 30 : Ka Assam ha ka snem kaba san kynthih kala kylla long ka jylla kaba jur tam ki kam thombor pyrshah ia ki kynthei hapoh ka ri.
Katkum ka jinglum jingkhein ba dang shen da ka National Crime Records Bureau (NCRB), ka jingdon jong ki kam pyntriem pyrshah ia ki kynthei hapoh Assam ha kane ka snem ba la dep kalong da 168.3.
Haba khein kyllum, ka jingdon jong ki kam pyntriem pyrshah ia ki kynthei hapoh Assam ka kham heh shibun haba ia nujor bad ka jingdon jong kiba kum kine ki kam pyntriem hapoh ka ri, kata kaba long da kumba 64.5.
Katkum ka jinglum jingkhein da ka NCRB, ki jylla kiba bud hadien ka Assam ki long ka Delhi (147.6) bad ka Odisha (137.8).Ha ka snem 2017, ka jingdon jong ki kam pyntriem pyrshah ia ki kynthei kalong 143.3.
Ha ka snem 2018, ka jingdon jong ki kam thombor pyrshah ia ki kynthei hapoh Assam, ka long da 166; 177 ha u 2019 bad 154.3 ha u 2020.
Napdeng baroh ki case kam pyntriem pyrshah ia ki kynthei bala rejistar hapoh Assam ha ka snem ba la dep, haduh 12,950 tylli ki dei na ki kam thombor jong ki kurim lane kiba haiing hasem jong ki kiba hap hapoh ka kyndon Section 498A ka IPC.
Ka Assam kala sakhi ruh halor ki kam rahbor kaba heh tam pyrshah ia ki kynthei, kata haduh 5866 tylli ha ka snem 2021.
Shuh shuh ka Assam ka dei ruh ka jylla kaba bun eh ki kam leh beijot pyrshah ia ki khynnah kiba dang hapoh rta (POCSO Act), kata haduh 1948 tylli ki jingjia, ha ka ba 1317 ki dei ki kam leh beijot pyrshah ia ki khunlung khynnah, 424 ki kam jrongkti ia ki kynthei, bad 158 ki kam lehbor.
